پونچھ: آتشزدگی کے سبب متعدد دکانیں خاکستر

جموں و کشمیر کے ضلع پونچھ کی تحصیل منڈی بلاک لورون میں آتشزدگی کے سبب 9 دکانیں جل کر خاک ہوگئیں۔ آگ لگنے کے بعد فوجی جوان اور مقامی لوگوں نے اس پر قابو پانے کی کوشش کی۔

آتشزدگی کے سبب دکانوں میں رکھے سامان جل گئے۔ مقامی لوگوں نے برہمی کا اظہار کرتے ہوئے کہا کہ اگر فائر بریگیڈ عملہ بروقت کارروائی کرتا تو اتنی زیادہ دکانیں آگ کی زد میں نہیں آتیں۔

لوگوں نے مزید کہا کہ 'غریب لوگوں نے قرض لے کر دکانیں شروع کی تھیں لیکن آتشزدگی کے باعث ان کا لاکھوں روپے کا سامان جل کر راکھ ہوگیا ہے۔

بتایا جارہا ہے کہ مقامی افراد، فوجی جوانوں اور پولیس اہلکاروں نے آگ پر قابو پانے کی کوشش کی۔

واضح رہے کہ چند روز قبل سے ہی یہ دکانیں کھلی تھیں کہ یہ حادثہ پیش آیا اور سارا سامان جل کر راکھ کے ڈھیر میں تبدیل ہو گیا۔

فی الحال آگ لگنے کی وجہ معلوم نہیں ہوسکی ہے۔

پولیس تھانہ لورون میں مقدمہ درج کر کے تحقیقات شروع کر دی ہے۔ مقامی لوگوں نے اپیل کی ہے کہ متاثرین کی مالی مدد کی جائے۔