ایک ایسے وقت میں جبکہ وادی اور بالخصوص جنوبی کشمیر میں عسکریت پسندوں کی تعداد میں کمی واقع ہوئی ہے جنوبی کشمیر کے اونتی پورہ پولیس نے ان دو نوجوانوں کو عسکریت پسندوں کے صفوں میں شامل ہونے سے روک لیا۔
پولیس کے مطابق' دونوں نوجوان سوشل میڈیا پر جہادی پروپیگنڈہ کی وجہ سے عسکریت کی طرف مائل ہو گئے تھے۔'
پولیس کے مطابق ان نوجوانوں میں ایک ترال جبکہ دوسرا اونتی پورہ علاقے کا رہنے والا ہے۔ پولیس نے دونوں نوجوانوں کو اپنے والدین کے حوالے کر کے ان کو نصیحت کی کہ وہ کسی بھی ملک مخالف سرگرمی سے باز رہے اور اپنے مستقبل کو تابناک بنانے کے لیے کوشش کریں۔
واضح رہے کہ گزشتہ دو ماہ کے دوران سکیورٹی فورسز نے مقامی پولیس کے باہمی اشتراک سے دو درجن کے قریب عسکریت پسندوں کو ہلاک کرنے میں کامیابی حاصل کی ہے۔
