امریکہ کی نائب معاون وزیر خارجہ برائے جنوبی و وسطی ایشیائی امور ایلس ویلز نے حال ہی میں ختم ہونے والے تین ملکی دورے کے بارے میں میڈیا بریفنگ کے دوران کہا کہ ' مجھے جموں و کشمیر میں انٹرنیٹ سروس کی جزوی یا کلی بحالی سمیت کچھ اضافی اقدامات دیکھ کر خوشی ہوئی ہے۔'
واضح رہے کہ مرکزی حکومت نے جموں و کشمیر میں تقریباً چھ ماہ کے بعد 2جی انٹرنیٹ سروس بحال کی ہے لیکن سوشل میڈیا پر پابندی برقرار رہے گی۔
انہوں نے کہا کہ انہیں اس بات کا علم ہے کہ امریکی سفیر اور دیگر غیر ملکی سفارت کاروں کے دورۂ کشمیر کو پریس میں بڑے پیمانے پر کور کیا گیا تھا۔
خیال رہے کہ ایلس ویلز کشمیر کے معاملے پر آواز اٹھاتی رہی ہیں۔ حال ہی میں بھارت کے دورے سے قبل انہوں نے کشمیر کو متنازع علاقہ قرار دیتے ہوئے کہا تھا کہ بھارت کی جانب سے کشمیر کی خصوصی حیثیت ختم کرنے سے اس مسئلے پر امریکہ کا مؤقف تبدیل نہیں ہوا۔
ایلس ویلز نے میڈیا سے گفتگو کے دوران کہا کہ امریکہ جموں و کشمیر میں سفارتکاروں کی رسائی اور حراست میں لئے گئے ہند نواز سیاسی رہنماوں کے رہائی کے لیے حکومت سے بات چیت کرتی رہیں گی