Rain In Jammu جموں میں مسلسل بارش کے سبب عام زندگی مفلوج

جنوب مغربی مانسون میں مسلسل شدید بارشوں اور لینڈ سلائیڈنگ نے پہاڑوں سے لے کر میدانی علاقوں میں تک تباہی مچا دی ہے۔ جموں میں لوگوں کو بارش سے ابھی تک کوئی راحت نہیں ملی ہے۔

جموں: مرکز کے زیر انتظام یوٹی جموں و کشمیر کے جموں سمیت دیگر اضلاع میں بارش کا سلسلہ جاری ہے۔ محکمہ موسمیات کے مطابق جموں میں اگلے تین دنوں تک موسلادھار بارش کا امکان ہے۔ یعنی 23 جولائی تک جموں و کشمیر میں موسلادھار بارش کا امکان ہے۔ ساتھ ہی محکمہ موسمیات کے عہدیدار نے یہ بھی بتایا کہ آج جموں کے کچھ علاقوں میں موسلادھار سے بہت زیادہ بارش کا امکان ظاہر کیا گیا ہے۔

ذرائع کے مطابق ریاسی کٹرہ میں گزشتہ روز کئی سالوں کا ریکارڈ ٹوٹ گیا۔ کل وہاں بہت بارش ہوئی۔ ساتھ ہی ادھم پور میں بھی موسلادھار بارش ہوئی ہے۔ محکمہ موسمیات کے اہلکار نے لوگوں سے بھی الرٹ رہنے کی اپیل کی ہے، خاص طور پر وہ لوگ جو پہاڑی علاقوں کی طرف رہتے ہیں یا وہ لوگ جو دریاؤں اور نالوں کے قرب رہتے ہیں۔

اطلاعات کے مطابق بارش کے باعث دریاؤں کی سطح آب میں اضافہ ہو سکتا ہے۔ بتا دیں کہ جموں کٹھوعہ میں گزشتہ روز مٹی کے تودے گرنے سے آٹھ افراد کی موت ہو گئی تھی۔ جموں کے کٹھوعہ کی تحصیل بنی میں لینڈ سلائیڈنگ کا واقعہ پیش آیا۔ مرنے والے تمام افراد کا تعلق تین ہی خاندان سے بتایا جا رہا ہے۔

جموں سری نگر قومی شاہراہ رامبن اور بانہال کے درمیان راستے پر پہاڑوں سے مٹی کے تودے گرنے اور چٹانیں گرنے کی وجہ سے چھ گھنٹے سے زیادہ بند رہی۔ اس کے ساتھ ہی ہیرا نگر علاقے میں دیالچک اور چڈوال کے درمیان ترنا نالے پر پل میں شگاف پڑنے سے جموں-پٹھانکوٹ شاہراہ کو غیر معینہ مدت کے لیے بند کر دیا گیا ہے۔