پانی دستیاب نہ ہونے پر فصلوں کو نقصان، مقامی آبادی پریشان

مقامی آبادی لفٹ ایریگیشن اسٹیشن سے اپنی زمینوں کی سینچائی کرتے تھے تاہم اب کورونا کے دوران پانی نہ ہونے سے کسان اور بھی پریشان ہے۔

وسطی کشمیر کے ضلع گاندربل کے وتلار علاقے کے لوگوں نے الزام عائد کیا ہے کہ ایریگیشن اور فلڈ کنٹرول محکمے نے علاقے میں ایک سال خراب ہوئے لفٹ ایریگیشن اسٹیشن کو ابھی بھی ٹھیک نہیں کیا جس کی وجہ سے مقامی زمیندار پریشان حال ہے۔

مقامی لوگوں کا الزام ہے کہ ایک طرف ضلع انتظامیہ کسانوں کی بہتری کے لیے بڑے بڑے دعوے کر رہی ہے تو وہیں دوسری طرف حقیقی پہلو میں کچھ نہیں کر رہی ہے۔

مقامی لوگوں نے الزام عائد کرتے ہوئے کہا کہ 2019 میں وتلار لفٹ ایریگیشن سٹیشن بےکار پڑا ہوا ہے اور انتظامیہ کے ساتھ ساتھ متعلقہ محکمہ کے افسران ٹس سے مس نہیں ہو رہے ہیں۔

انہوں نے الزام عائد کیا کہ علاقے میں فصلیں پانی نہ ہونے سے تباہ ہونے لگی ہے جس کی وجہ سے مقامی آبادی میں تشویش کی لہر دوڑ گئی ہے۔

ایک مقامی زمیندار نے کہا کہ اگرچہ مقامی آبادی اس لفٹ ایریگیشن اسٹیشن سے اپنی زمینوں کی سینچائی کرتے تھے تاہم اب کورونا کی مار میں پانی نہ ہونے سے کسان اور بھی پریشان ہے۔

اُنہوں نے کہا کہ وطلار لفٹ ایریگیشن سٹیشن میں تکنیکی خرابی کے بعد ملازمین نے بھی آنا چھوڑ دیا اور انتظامیہ اسے چند پیسوں میں ہی ٹھیک کرا سکتی تھی تاہم اُنہوں نے کبھی بھی توجہ نہیں دی۔