سڑک حادثے کے دوران ایک شخص ہلاک

جموں و کشمیر کے ضلع رامبن میں سڑک حادثہ کے دوران ایک شخص ہلاک ہو گیا۔

پولیس ذرائع کے مطابق فاروق احمد نامی ڈرائیور، گزشتہ شام اپنی ٹاٹا سومو گاڑی زیر نمبر JK14B-1900 لنک روڈ باگنہ بلہوت میں پارک کر کے گھر چلے گئے تھے۔ آج صبح گاڑی پارکنگ کی جگہ سے غائب تھی جس کے بعد ڈرائیور نے گاڑی کی تلاش کی جس کے بعد معلوم ہوا کہ ان کی گاڑی پارکنگ سے نزدیک 500 فٹ گہرے نالے میں گری ہوئی تھی۔

مقامی لوگوں، پولیس اور سول رضاکاروں نے بچاؤ مہم شروع کر کے حادثہ کی جگہ سے ایک لاش برآمد کی جس کی پہچان راکیش سنگھ 22 ولد کلدیپ سنگھ ساکنہ السی باگنہ تحصیل و ضلع رامبن کے طور ہوئی ہے۔

بتایا جارہا ہے کہ ہلاک شدہ شخص گاڑی چلانا سیکھ رہا تھا کہ دیر رات حادثہ کا شکار ہو گیا۔ پولیس نے لاش کو ضلع ہسپتال رامبن منتقل کیا ہے۔

قانونی کارروائی کے بعد لاش وارثین کے حوالے کر دی جائے گی۔ اس سلسلے میں تھانہ پولیس نے معاملہ درج کر کے تحقیقات شروع کر دی ہے۔