نوگام سیکٹر میں فوجی جوان ہلاک

جموں و کشمیر کے نوگام سیکٹر میں ایک خوفناک بارودی سرنگ دھماکے میں ایک فوجی ہلاک اور دو زخمی ہوگئے ہیں۔

فوجی ذرائع کے مطابق شمالی کشمیر کے کپواڑہ ضلع میں واقع نوگام سیکٹر میں یہ جوان پیر کے روز لائن آف کنٹرول کی نگرانی پر مامور تھے ،اسی دوران وہ ایک بارودی سرنگ کی زد میں آگئے۔

دھماکے میں ایک فوجی کی موقع پر ہی موت واقع ہوگئی جبکہ اسکے دو ساتھی زخمی ہوگئے، جنہیں علاج کیلئے اسپتال منتقل کیا گیا۔

ہلاک فوجی اہلکار کی شناخت تھیرواننداپورم کیرالہ کے ابھیجیت کے طور ہوئی ہے جو 25 مدراس ریجمنٹ کے ساتھ وابستہ تھے۔

اس سے ایک رو ز قبل شمالی کشمیر کے ہی بارہمولہ ضلع میں اوڑی سیکٹر میں پاکستان کی طرف سے کی گئی شدید گولہ باری میں ایک فوجی جوان ہلاک ہوگیا تھا۔