سرینگر: نرس کی لاش برآمد

جموں و کشمیر کے دارالحکومت سرینگر کے بژھپورہ میں ایک جواں سال نرس اپنے کمرے میں مردہ پائی گئی۔

اطلاعات کے مطابق شیر کشمیر انسٹی ٹیوٹ آف میڈیکل سائنسز اسپتال میں کام کرنے والی یہ نرس جنوبی کشمیر کے ضلع اننت ناگ کے ڈورو علاقے سے تعلق رکھنے والی تھی اور اس وقت صورہ کے اسکمز اسپتال میں بطور نرس کام کر رہی تھی۔

افروزہ اختر نامی اس نرس کو منگل کے روز اپنے کرائے کے کمرے میں مردہ پایا گیا۔

پولیس نے اس سلسلے میں جانچ شروع کی ہے۔ تاہم اس بات کا اندازہ لگایا جا رہا ہے کہ مذکورہ نرس کی موت دل کا دورہ پڑنے سے ہوئی ہوگی۔

ای ٹی وی بھارت نے اس سلسلے میں کئی بار سکمز اسپتال کے ڈائریکٹر سے رابطہ کرنا چاہا۔ تاہم وہ بات کرنے کے لیے موجود نہیں تھے۔