خانہ بدوش لوگ حسن کی آغوش میں

وادی کشمیر جسے جنتِ بے نظیر بھی کہا جاتا ہے، اس کا رفتہ رفتہ گوشہ گوشہ قدرتی حسن و جمال سے مالامال ہے۔ سرسبز سونے کی کان کے بالکل اوپر آسمان میں جلوہ بکھیرئے ہوئے سفید بادل، بانہیں پھیلائے ہوئے کوکرناگ کی حسین وادیاں، گلیشروں سے پگھلتی ہوئی دودھ جیسی نہریں، اور اُن نہروں کی لہروں کا جھل ملاتا سنگیت، جسے سُن کر نہ صرف بے جان جسم میں جان آجاتی ہے بلکہ انسان کی روح کو سکون اور تسلّی بخشتی ہے۔

حلقہ انتخاب کوکرناگ میں قدرت نے ہر طرف اپنے جلوے بکھیر کے رکھے ہیں، یہاں کی سر سبز خوبصورت وادیاں اور ان وادیوں میں صاف و شفاف آب وہوا، اُس آب و ہوا اور پُرسکون ماحول سے لطف اندوز ہونے کے لئے موسم گرما شروع ہوتے ہی خانہ بدوش لوگ اپنے مال مویشی سمیت ہر سال ان پُر فضاء مقامات کا رُخ کرتے ہیں، اور ہر سال گرمیوں کی تپش سے بچنے کے لئے تقریباً چار سے پانچ مہینے تک کا عرصہ ان خوبصورت اور جنت نما وادیوں میں بسر کرتے ہیں۔

ان پُر سکون وادیوں سے لطف اندوز ہونا کوئی ان سے سیکھے جن کے پاس نہ تو اپنا کوئی ذر ہے اور نا ہی زمین۔ بس جو قدرت نےانہیں بخشتا ہے یہ خانہ بدوش اُسی سے گذارہ کرتے ہیں۔ حالانکہ قدرت نے انہیں ہر ایک نعمت سے نوازا ہے۔ جس کا نہ صرف خانہ بدوش بلکہ ان کے مال مویشی بھی بھرپور فائدہ اٹھاتے ہیں۔ شہروں اور بازاروں کے شوروغل سے محفوظ کوکرناگ کی دور دراز پہاڑیوں کے دامن تلے خانہ بدوش لوگوں کا کہنا ہے کہ اس سال کے کٹھن وقت سے لڑنے کے لئے ایسے مقامات کا رخ کرتے ہیں۔

ان کا کہنا ہے کہ جہاں پوری دنیا کوعالمی وبائی بیماری کورونا وائرس نے جکڑ کے رکھا ہے، ایسے میں ان خانہ بدوش لوگوں کو معمولی سر درد کی گولی کی ضرورت بھی نہیں پڑتی۔

ان کا کہنا ہےکہ جس طرح سے شہروں، گاوں اور بازاروں کے ساتھ ساتھ دیگر مقامات پر لوگوں کو سماجی دوری اختیار کرنے اور ماسک یا سینیٹائزر کو استعمال کرنے کی ضرورت پڑتی ہے، انہیں ایسے چیزوں کی یا اس طرح کی تدابیر عملانے کی کوئی ضرورت محسوس ہی نہیں ہوتی۔

اگرچہ ان خانہ بدوش افراد کے پاس دیگر لوگوں کی طرح مکان، جائداد یا گاڑیاں نہیں ہوتی ہے، تاہم ایسے افراد ان پُر فضاء مقامات کا رُخ اسلئے کرتے ہیں تاکہ یہ جسمانی نشونماء اور اپنی صحت کو بیماریوں سے محفوظ رکھ سکیں۔

شہروں اور بازاروں کی آلوگی سے دور نہ صرف پُر سکون ماحول حاصل کرنے کے لئے بلکہ دیگر اقسام کے قدرتی آب و ہوا سے لطف اندوز ہونے کے لئے خانہ بدوش ایسی جنت نماء وادیوں کا رُخ کرتے ہیں۔ یہی وجوہات ہے کہ ایسے لوگ بیماریوں سے محفوظ رہتے ہیں۔