کشمیر کے مختلف گوشوں سے آئے ہوئے افراد نے اس رنگین شام کو یادگار بنانے کے لیے کچھ حسین پلوں کا سہارا لیا۔
اس شام میں جہاں مقامی فنکاروں نے اپنے فن کا جادو بکھیرا اور حاضرین کو محظوظ کیا، وہیں بچوں اور دیگر لوگوں نے بھی موسیقی کی دھن پر اپنے اندر کے فنکار کو باہر لاکر نئے سال کا استقبال کیا۔
لوگوں کی ایک بڑی تعداد نے اس موسیقی پروگرام میں حصہ لیا اور حسین و دلکش مناظر کا لطف اٹھایا۔
شہرہ آفاق سیاحتی مقام پہلگام میں سال نو کی آمد پر منعقدہ اس پروگرام میں فنکاروں نے جہاں صوفیانہ موسیقی کے سروں کا جادو بکھیرا، وہیں کچھ کم عمر فنکاروں نے بالی ووڈ اور ریپ گانے گا کر حاضرین کو مسحور کر دیا۔
اس پروگرام کا مقصد اگرچہ سیاحتی صنعت کو مزید فروغ دینا تھا لیکن مقامی فنکاروں نے اسے ایک مناسب پلیٹ فارم پاکر اپنے ہنردکھائے۔
واضح رہے کہ کشمیر کے موجودہ حالات میں سب سے زیادہ جنوبی کشمیر کو متاثر ہونا پڑا ہے ایسے میں پہلگام میں شام موسیقی کا اہتمام زخمی دلوں پر مرہم لگانے کی ایک کوشش کے ساتھ ساتھ سیاحتی صنعت کو واپس پٹری پر لانے کے لیے ایک بہترین ذریعہ بھی ہے۔
