شیر کشمیر بھون میں ایک پریس کانفرنس سے خطاب کرتے ہوئے صوبائی صدر دیویندر سنگھ رانا نے سابق وزیراعلیٰ فاروق عبداللہ کے خلاف پی ایس اے میں توسیع کرنے پر سخت نکتہ چینی کی۔
انہوں نے وزیراعظم نریندر مودی سے عوام تک رسائی حاصل کرنے کا مطالبہ کرتے ہوئے کہا کہ 'وہ کشمیریوں کے دل جیتنے کی کوشش کریں'۔ انہوں نے کہا کہ 'ریاست میں جاری سیاسی خلاء کو پر کرنے کےلیے مرکزی حکومت کو بامقصد مذاکرات کا آغاز کرنا چاہیے'۔
دیویندر سنگھ رانا نے پانچ مرتبہ کے وزیراعلیٰ اور سابق مرکزی وزیر فاروق عبداللہ کو پبلک سیفٹی ایکٹ کے تحت حراست میں لئے جانے کو افسوسناک قرار دیا۔ انہوں نے فاروق عبداللہ کی ملک کے تئیں کی گئی خدمات کو سراہا اور سابق وزیراعلیٰ فاروق عبداللہ کو ایک محب وطن قرار دیا۔
نیشنل کانفرنس کے رہنما نے فاروق عبداللہ کی حراست میں مزید 3 ماہ کی توسیع کو جمہوریت کےلیے دھچکہ قرار دیا۔ انہوں نے کہا کہ 'نیشنل کانفرنس نے محمد علی جناح کے دو ملکی نظریہ کی مخالفت کرتے ہوئے جمہوری بھارت کو تقویت بخشنے کا کام کیا ہے'۔
پریس کانفرنس میں نیشنل کانفرنس کے سینیئر رہنما اجئے کمار سودوتھرا، سرجیت سنگھ سلاتھیا، سید مشتاق احمد شاہ بخاری، عبدالغنی ملک، رتن لال گپتا، راجپال سنگھ، بابو رامپال، تریلوچن سنگھ وزیر، شیخ بشیراحمد، پردیپ بالی، وجئے لوچھن، عبدالغنی تیلی اور دھرم ویر سنگھ جموال موجود تھے۔
