ان دنوں وادیٔ کشمیر میں موبائل فون اب خاص طور پر نوجوانوں کے لیے تفریح کا ایک ذریعہ ہی بن کر رہ گیا ہے۔
شہر و دیہات میں اکثر و بیشتر نوجوان موبائل فون پر طرح طرح کے گیمز کھیلتے دیکھے جا سکتے ہیں۔ وہیں یہ موبائل فون پر ویڈیوز اور فلمیں دیکھنے میں مشغول نظر آ رہے ہیں۔
نکڑوں، چوراہوں اور گھروں میں نوجوان موبائل گیمز بھی کھیلتے نظر آ رہے ہیں جو گیمز دو سے زائد افراد کھیلتے ہیں مثلاً لوڈو، اسنیک لیڈر وغیرہ۔
دوسری جانب پانچ اگست سے مواصلاتی نظام ٹھپ کیے جانے سے قبل اگرچہ مختلف قسم کے ویڈیوز، فلمیں اور گیمز نوجوان انٹرنیٹ کے ذریعے ڈاؤن لوڈ کیا کرتے تھے۔ تاہم آج ایک دوسرے کے موبائل سے شیئر کرتے ہیں جس کے بعد یہ اپنی پسند اور اپنے وقت کے حساب سے تفریح کے استعمال میں لاتے ہیں۔
موبائل اور انٹرنیٹ سروس بند رہنے کے نتیجے میں جہاں عام لوگوں کو طرح طرح کی مشکلات کا سامنا ہے، وہیں انٹرنیٹ کی عدم موجودگی سے نوجوان بھی کئی مسائل سے دوچار ہیں۔
انتظامیہ کی جانب سے اگرچہ لینڈلائن خدمات کو بحال کیا گیا ہے لیکن وادیٔ کشمیر کی بیشتر آبادی مو بائل فون پر منحصر ہے۔ اب دیکھنا یہ ہوگا کہ کیا آنے والے وقت میں موبائل فون، گیمز کھیلنے، ویڈیوز اور فلمیں وغیرہ دیکھنے تک ہی محدود رہے گا یا انٹرنیٹ اور موبائل سروس کو بحال کرکے فون سے اصل کام بھی انجام دیے جا سکیں گے!
