اونتی پورہ: ملک کی دوسری ریاستوں کی طرح مرکز کے زیر انتظام یوٹی جموں کشمیر کے پلوامہ سمیت تمام اضلاع میں آل انڈیا مہیلا کانگریس کے یوم تاسیس کے موقعے پر تقریبات کا اہتمام کیا گیا۔ اونتی پورہ میں بھی مہیلا کانگریس کا 40 واں یوم تاسیس منایا گیا جس میں مقامی خواتین اور پارٹی کارکنان نے شرکت کی۔ پروگرام کی صدارت یو ٹی صدر مہیلا کانگریس شمیمہ رینا نے کی، جب کہ مہیلا کانگریس کی رضوانہ نثار بھی رینا کے ہمراہ موجود رہی۔ اس موقعے پر شمیمہ رینا نے شرکت کرنے والی خواتین کو آنے والے برسوں میں کانگریس پارٹی کی طرف سے مکمل تعاون کا یقین دلایا، جب کہ انہوں نے ان سے اپیل کی کہ وہ ایسے امیدوار کا انتخاب کریں، جو ان کے مطالبات کو پورا کر سکے۔
میڈیا کے ساتھ بات کرتے ہوئے شمیمہ رینہ نے بتایا کہ مہیلا کانگریس کی داغ بیل سال 1940 میں ڈالی گئی تھی جس دوران ملک کی سابق وزیر اعظم اندرا گاندھی نے ملک کی خواتین کو با اختیار بنانے کے لیے ٹھوس اقدامات کیے اور یہی وجہ ہے کہ ہمارے ملک میں خواتین سیاسی میدان میں بھی آگے بڑھ رہی ہیں انہوں نے مزید بتایا کہ فی الوقت جموں وکشمیر میں مہیلا کانگریس بہت زیادہ متحرک ہے اور ہماری کوشش رہے گی کہ اپنے حقوق کی لڑائی کے لیے برابر لڑتے رہیں۔