'کشمیری ہو کر بھی ڈومیسائل سرٹیفکیٹ حاصل کرنے میں دشواریاں کیوں؟'

جموں و کشمیر میں غیر مقامی شہریوں کو ڈومیسائل سرٹیفکیٹ دیا جارہا ہے تو وہیں وادی کشمیر کے مقامی افراد کا دعویٰ ہے کہ انہیں سرٹیفکیٹ حاصل کرنے میں کئی مشکلات کا سامنا کرنا پڑ رہا ہے۔

وسطی کشمیر کے ضلع بڈگام کے کنی پورہ چھترگام کے رہنے والے شاہد خان نے کہا ہے کہ انہیں ڈومیسائل سرٹیفکیٹ کے لیے سرکاری دفاتر کے چکر کاٹنے پڑ رہے ہے۔ چکر کاٹنے کے باوجود بھی اُن کے ہاتھ کچھ نہیں لگا۔

شاہد خان کا کہنا ہے کہ وہ سرینگر کے کوکر بازار علاقے میں رہتے تھے اس لئے انہھوں نے علاقے کے تحصیلدار سے اپنے شہری ہونے کا تصدیق نامہ حاصل کرنے کے بعد ضلع بڈگام کے تحصیلدار سے ڈومیسائل سرٹیفکیٹ کے لیے رجوع کیا۔

انہوں نے کہا کہ 'تاہم ان کے دستاویز کو ناکافی مانتے ہوئے تحصیلدار نے مقامی شہری ثابت ہونے کے لیے مزید دستاویزات طلب کئے۔'

شاہد نے مزید کہا کہ ' کشمیری ہونے کی تمام دستاویزات میں بجلی بل سے لیکر راشن کارڈ تک سارے یہاں کے پشتنی باشندہ ہونے کے ثبوت پیش کئے. تاہم تحصیلدار ان سب کے باوجود بھی مطمئن نہیں ہوئے۔