بانڈی پورہ میں لشکر طیبہ کا عسکریت پسند گرفتار

آئی جی پی کشمیر وجے کمار کا دعوی ہے کہ بانڈی پورہ میں بدھ کے روز لشکر طیبہ کے عسکریت پسندوں نے ہی بی جے پی کے مقامی رہنما وسیم باری شیخ کو ان کے بھائی اور والد سمیت ہلاک کردیا تھا۔

شمالی کشمیر کے ضلع بانڈی پورہ میں پولیس نے شدت پسند تنظیم لشکر طیبہ کے ایک عسکریت پسند کو گرفتار کرنے کا دعویٰ کیا ہے۔

جموں و کشمیر پولیس کی جانب سے جاری کردہ ایک بیان کے مطابق' بانڈی پورہ کے حاجن قصبہ میں عسکریت پسندوں کی تقل و حرکت کے حوالے سے ایک خفیہ اطلاع ملنے پر بانڈی پورہ پولیس، فوج کے 13 آر آر اور سی آر پی ایف کے 45 بٹالین نے حاجن قصبے کے ہاکبرا علاقے میں ایک مشترکہ ناکہ لگایا ۔

پولیس بیان کے مطابق ناکے کے دوران رفیق احمد نامی ایک عسکریت پسند کو ناکہ پارٹی پر گرینیڈ پھینکنے کی کوشش کے دوران گرفتار کرلیا گیا۔

پولیس نے اس کے قبضے سے دھماکہ خیز مادہ اور اس کے ساتھ زندہ دستی بم ، اے کے 47 کے 19 راؤنڈ برآمد کیے ہیں۔

پولیس کے مطابق اس گرفتار شدہ عسکریت پسند نے حال ہی میں لشکر طیبہ میں شمولیت اختیار کی تھی جسے حاجن علاقے میں پولیس اور دیگر سکیورٹی فورسز پر دستی بم دھماکہ پھینکنے کا کام سونپا گیا تھا۔

تاہم اس معاملے میں پولیس اسٹیشن حاجن میں ایف آئی آر درج کی گئی ہے اور تفتیش شروع کردی گئی ہے۔

واضح رہے بدھ کے روز عسکریت پسندوں نے بانڈی پورہ پورہ میں بی جے پی کے مقامی رہنما وسیم باری شیخ کو ان کے بھائی اور والد سمیت ہلاک کردیا تھا۔