حقیقی کنٹرول لائن پر خاص طور پر تین جگہوں پر دونوں فوجوں کے مابین تعطل ہے اور گزشتہ ایک مہینے سے دونوں نے وہاں اچھی خاصی تعداد میں فوج جمع کر رکھی ہے۔
لیفٹیننٹ جنرل سطح کے افسران کی یہ میٹنگ چین کے چوشول مولڈو واقع بارڈر پرسنل میٹنگ پوائنٹ پر ہوگی، جو اس طرح کی میٹنگوں کے لئے لداخ میں مقرر دو مراکز میں سے ایک ہے۔
میٹنگ میں بھارت کی قیادت لیہہ واقع 14 ویں کور کے کمانڈر لیفٹیننٹ جنرل ہریندر سنگھ کریں گے جبکہ چین کی جانب سے ان کے ہم منصب فوجی افسر بات چیت کی میز پر ہوں گے۔
منگل کو فوج کی 3 ڈویژن کے سربراہ جو میجر جنرل رینک کے افسر ہیں، انہوں نے اپنے چینی ہم منصب کے ساتھ اس معاملے پر بات چیت کی تھی لیکن یہ بات چیت بے نتیجہ رہی۔ اس کے بعد جمعہ کو اعلی سطح میٹنگ کا فیصلہ کیا گیا۔ اس کے علاوہ بھی دونوں فریقین کے درمیان مختلف سطح کے افسران کی تقریباً 8 میٹنگیں ہوچکی ہیں۔
