کشمیری عازمین حج تشویش میں مبتلا

سفر محمود پر روانہ ہوئے ہزاروں کشمیری عازمین اپنے وطن کی صورتحال پر انتہائی تشویش میں مبتلا ہیں۔

مکہ مکرمہ سے ایک کشمیری عازم جاوید احمد نے ای ٹی وی بھارت کو بتایا کہ سبھی کشمیری عازمین کشمیر کی صورتحال سے انتہائی پریشان ہیں۔

انہوں نے کہا کہ وہ حج کی تیاریوں میں مصروف تھے اور اسی دوران انہیں اطلاع ملی کہ کشمیر میں حالات خراب ہوگئے ہیں اور سیاحوں کو کشمیر چھوڑنے کا حکم دیا گیا ہے۔

انہوں نے کہا کہ کشمیری عازمین ایک دوسرے کو دلاسہ دے رہے ہیں کہ سب کچھ ٹھیک ہوگا لیکن انکے چہروں سے پریشانی صاف جھلک رہی ہے۔

انہوں نے مزید کہا کہ 'ہمارے گھر والے ہم سے رابطہ نہیں کرپارہے ہیں۔ ہم نے سفارت خانے سے بھی رابطہ قائم کیا لیکن وہ بھی کوئی اطلاع نہیں دے رہے ہیں۔'

احمد نے کہا کہ سبھی عازمین کشمیر کی سلامتی کے لیے دعائیں مانگ رہے ہیں۔

ادھر کئی ممالک میں مقیم کشمیری بھی اپنے وطن کی سلامتی کے حوالے سے پریشان ہیں۔

مسقط سے ڈاکٹر فیاض میر نے ای ٹی وی بھارت کو بتایا کہ انکی اہلیہ اور دو چھوٹے بچے کشمیر میں ہیں اور وہ عید کے موقعے پر کشمیر جانے والے تھے لیکن اب انہیں کشمیر کے بارے میں کچھ بھی معلوم نہیں ہے کہ وہاں کیا ہورہا ہے۔

انہوں نے کہا 'میں پریشان ہوں کہ ٹکٹ منسوخ کروں یا نہیں۔ گھر والے کس حال میں ہیں، مجھے کوئی علم نہیں ہے۔'