کشمیر: برہان وانی کی برسی پر مکمل ہڑتال

وادی کشمیر میں عسکری کمانڈر برہان مظفر وانی کی تیسری برسی کے موقع پر علیحدگی پسندوں کی ہڑتال کے سبب عام زندگی مفلوج ہو کر رہ گئی ہے۔

ہڑتال کی وجہ سے وادی کشمیر کے بیشتر علاقوں میں تعلیمی و تجارتی ادارے بند ہیں جبکہ سڑکوں پر ٹریفک برائے نام ہے۔
انتظامیہ نے اس موقع پر کسی بھی ناخوشگوار حالات سے نمٹنے کے لیے سکیورٹی کے سخت انتظامات کیے ہیں اور بیشتر حساس علاقوں میں اضافی سکیورٹی دستے تعینات کیے گئے ہیں۔
حکام نے وادی کے بیشتر علاقوں میں موبائل انٹرنیٹ سروسز کو یا تو معطل کر دیا ہے یا پھر اس کی رفتار میں کمی کی گئی ہے۔
حالات کی نزاکت کے پیش نظر ریل سروسز کو بھی معطل کر دیا گیا ہے۔
ادھر ریاست کی علیحدگی پسند قیادت نے آج برہان وانی کو خراج تحسین پیش کیا ہے۔
عسکری کمانڈر برہان وانی کا تعلق ترال سے تھا جنہیں آج ہی کے دن سنہ 2016 میں اننت ناگ کے کوکر ناگ علاقے میں سیکورٹی فورسز نے ہلاک کر دیا تھا۔
اس کے بعد وادی کشمیر میں کئی ماہ تک مظاہرے، احتجاج اور ہڑتالوں کا سلسلہ جاری رہا تھا جس میں بڑی تعداد میں نوجوان ہلاک اور ہزاروں افراد زخمی ہوئے تھے۔
وادی کشمیر میں سرگرم سب سے بڑی مقامی عسکری تنظیم حزب المجاہدین سے تعلق رکھنے والے برہان وانی کی ہلاکت کو حکومت نے دہشت گردی کے خلاف بڑی کامیابی قرار دیا تھا لیکن اس کے بعد سے اب تک وادی میں حالات کشیدہ ہیں۔