سرینگر: جموں و کشمیر بورڈ آف اسکول ایجوکیشن (جے کے بوس) کی جانب سے ہفتے کے روز اسکولی نصابی کتاب کے حوالے سے ایک نوٹیفیکیشن جاری کیا گیا جس میں تمام پرائیویٹ اسکولوں کے لیے ایک اہم علان کیا گیا ہے۔ بورڈ کی جانب سے جاری کردہ نوٹیفکیشن میں کہا گیا ہے کہ "تمام اسٹیک ہولڈرز کو یہ اطلاع کیا جاتا ہے کہ بورڈ ایکٹ کے مطابق جے کے بوس کا مینڈیٹ ہے کہ وہ پرائمری، ایلیمنٹری، سیکنڈری اور ہائر سیکنڈری اسکولوں کے لیے نصاب تیار کریں اور نصابی کتابیں بھی لکھے۔ اور بعد ازیں تمام اسکولز جے کے بوس کی جانب سے شائع کردہ نصابی کتابوں کا نفاذ کریں۔
نوٹیفکیشن میں مزید کہا گیا ہے کہ ' گزشتہ کچھ سالوں سے یہ بھی دیکھا جارہا ہے کہ بہت سے پرائیویٹ اسکولز جے کے بوس کی طرف سے شائع کردہ نصابی کتاب کو کلاسز کے لیے تجویز نہیں کر رہے ہیں۔ اس کے بجائے وہ دوسرے پرائیویٹ اسکولز، پرائیویٹ پبلشرز کی نصابی کتابیں تجویز کررہے ہیں جو طلبہ کو مہنگے داموں میں دستیاب ہورہے ہیں۔