جنگ بندی کی خلاف ورزی، ایک عام شہری ہلاک

جموں و کشمیر کے سرحدی ضلع پونچھ کے مینڈھر سیکٹر میں پاکستانی فوج کی فائرنگ میں ایک عام شہری ہلاک ہوگیا۔

اطلاعات کے مطابق گذشتہ روز لائن آف کنٹرول پر پاکستانی افواج نے بھارتی چوکیوں اور رہائش علاقوں کو نشانا بنایا جس کی وجہ سے 22 سالہ عبدل کریم نامی شخص زخمی ہوگیا تھا۔عبدل کریم کو زخمی حالت میں ضلع ہسپتال میں داخل کیا گیا تھا لیکن آج عبدل کریم نے زخموں کی تاب نہ لا کر دم توڈ دیا۔ دوطرفہ فائرنگ میں دبراج گاؤں میں چھ رہائشی مکان بھی خاکستر ہوگئے۔

وہیں سرحدی علاقوں میں رہنے والے لوگوں میں دہشت کا ماحول ہے۔

واضح رہے کہ گزشتہ روز پونچھ کے کرشنا گھاٹی سیکٹر میں پاکستان کی فائرنگ میں ایک فوجی جوان ہلاک جبکہ 4 جوان زخمی ہوئے تھے ۔

خیال رہے کہ دو روز قبل پاکستان نے لائن آف کنٹرول پر بھارتی فوج کی جانب سے جنگ بندی کی خلاف ورزی پر بھارت کے ڈپٹی ہائی کمشنر کو دفتر خارجہ طلب کیا گیا۔

بھارتی ڈپٹی ہائی کمشنر گورو اہلوالیہ کو دفتر خارجہ طلب کیا گیا اور پاکستان کی جانب سے بھارتی فوج کی طرف سے جنگ بندی معاہدے کی خلاف ورزی کی شدید الفاظ میں مذمت کی گئی۔

پاکستان کے دفتر خارجہ کے ترجمان کی جانب سے کہا گیا کہ دو روز قبل لائن آف کنٹرول پر بھارتی فوج کی گولہ باری اور فائرنگ سے 2 شہری ہلاک اور ایک بچہ زخمی ہوا تھا۔

دفتر خارجہ کی جانب سے جاری بیان میں کہا گیا کہ بھارتی فوج ایل او سی اور ورکنگ باؤنڈری پر شہری آبادی کو نشانہ بنا رہی ہے۔

پاکستانی ترجمان نے کہا کہ بھارت مسلسل جنگ بندی معاہدے کی خلاف ورزی کر رہا ہے، جنگ بندی معاہدے کی خلاف ورزی سے علاقائی امن کو خطرہ ہے۔