کشمیر: دو عسکریت پسندوں کی زمین ضبط

دونوں عسکریت پسند اس وقت پاکستان میں مقیم ہیں اوران کی شناخت غلام نبی خان عرف عامر خان اور ظفر حسین بھٹ کے طور پر ہوئی ہے۔

مرکز کے زیر انتظام جموں کشمیر کے جنوبی ضلع اننت ناگ کے لیور پہلگام علاقے میں انفورسمنٹ ڈائرکٹوریٹ نے دو عسکریت پسندوں کی زمین کو ضبط کرلیا ہے۔ان دونوں عسکریت پسندوں کی شناخت غلام نبی خان عرف عامر خان اور ظفر حسین بھٹ کی حیثیت سے کی گئی ہے۔ ان دونوں عسکریت پسندوں کی بارہ کنال زمین کو انفورسمنٹ ڈائرکٹوریٹ (ای ڈی) نے ضبط کرکے اپنے قبضے میں لے لیا۔

قابل ذکر ہے کہ دونوں عسکریت پسند عامر خان اور ظفر حسین اس وقت پاکستان میں مقیم ہے۔ نوے کی دہائی میں دونوں ٹاپ کے عسکریت پسندوں میں شمار کیے جاتے تھے، اور دونوں کا تعلق حزب المجاہدین تنظیم سے تھا۔ای ڈی نے کس بنیاد پر ان کی جائیداد ضبط کی ہے اس سلسلہ میں مزید تفصیلات کا انتظار ہے۔