گلمرگ: 8 ماہ سے لاپتہ فوجی کی لاش برآمد

11 گرھوال رائفل کے جوان راجندر سنگھ نیگی کی لاش ملنے ان کے ارکان خاندان نے تصدیق کی ہے جبکہ وہ جاریہ سال جنوری میں ایل او سی کے قریب گلمرگ میں گشت کے دوران لاپتہ ہوگئے تھے۔

راجندر سنگھ نیگی کے رشتہ دار نے بتایا کہ راجندر کی لاش بازیاب ہونے کی اطلاع بٹالین کے عہدیداروں نے ان کی اہلیہ کو دی۔

انہوں نے بتایا کہ لاپتہ ہونے کے مقام سے ہفتہ کے روز برف پگھلنے کے بعد نیگی کی لاش کو برآمد کیا گیا۔

راجندر سنگھ کا کئی مہینوں سے پتہ نہیں چل سکا تھا جبکہ خیال کیا جارہا تھا کہ وہ کاروائی کے دوران ہلاک ہوگیا ہوگا اور اس سال مئی میں اس کی ہلاکت کا اعلان بھی کیا گیا تھا۔

نیگی اپنے والدین کے سب سے بڑے بیٹے تھے اور پسماندگان میں اہلیہ کے علاوہ دو بیٹیا اور ایک بیٹا شامل ہیں۔

اترکھنڈ کے وزیراعلیٰ تریویندر سنگھ راوت نے سوشیل میڈیا پوسٹ کے ذریعہ راجندر سنگھ کی موت پر اظہار تعزیت کرتے ہوئے ان کی شہادت کو سلام پیش کیا۔ وزیراعلیٰ نے راجندر سنگھ کی آتما کی شانتی کےلیے دعا کی اور خاندان کے ساتھ افسوس کا اظہار کیا۔ انہوں نے کہا کہ ریاستی حکومت ان کے ساتھ کھڑی ہے اور مدد فراہم کرنے کا بھی تیقن دیا۔