شدید سردی کے بعد کشمیر میں موسم خوشگوار

گذشتہ کئی ہفتوں سے لگاتار شدید سردی کے زد میں رہنے کے بعد شہر سرینگر سمیت وادی کے دیگر علاقوں میں شبانہ درجہ حرارت میں آج بھی بہتری دیکھی گئی۔

جموں و کشمیر اور لداخ میں درجہ حرارت میں نمایاں بہتری کے بعد لوگوں کو شدید سردی سے کچھ راحت ملی ہے۔ دونوں مرکزی علاقوں میں پیر کی صبح ہلکی دھوپ نکل آئی ہے۔

محکمہ موسمیات کے عہدیداروں کا کہنا ہے کہ جموں و کشمیر اور لداخ میں مزید چھ یا سات دن تک موسم خشک رہنے کا امکان ہے اور دن اور رات کے درجہ حرارت میں مزید اضافہ ہونا کا بھی امکان ہے۔'

وادی کشمیر کے رہائشیوں کا خیال ہے کہ امسال موسم بہار کی آمد کی توقع سے کہیں زیادہ پہلے ہوسکتی ہے۔

محکمہ موسمیات کے مطابق گرمائی دارلحکومت سرینگر میں پیر کی رات کم سے کم درجہ حرارت منفی 0.3 ڈگری سینٹی گریڈ ریکارڈ کیا گیا۔

بتادیں کہ قبل ازیں سرینگر میں رواں سیزن کے دوران 14 جنوری کو سرد ترین رات درج ہوئی تھی جب کم سے کم درجہ حرارت منفی 8.4 ڈگری ریکارڈ ہوا تھا اور سردیوں کا پچیس سالہ پرانا ریکارڈ ٹوٹ گیا تھا۔

وادی کے مشہور دہر سیاحتی مقام گلمرگ میں کم سے کم درجہ حرارت منفی 3.0 ڈگری سینٹی گریڈ جبکہ وادی کے دوسرے مشہور سیاح مقام پہلگام میں کم سے کم درجہ حرارت منفی 4.3 ڈگری سینٹی گریڈ ریکارڈ ہوا ہے۔

سرحدی ضلع کپوارہ میں کم سے کم درجہ حرارت منفی 2.3 ڈگری سینٹی گریڈ جبکہ قاضی گنڈ میں منفی 2.8 ڈگری سینٹی گریڈ اور کوکرناگ میں کم سے کم درجہ حرارت منفی 0.4 ڈگری سینٹی گریڈ ریکارڈ کیا گیا۔

وہیں جموں شہر میں کم سے کم درجہ حرارت 10.4، کٹرا میں 10.0، بٹوت میں 5.2، بنیہال 4.0 اور بھدرواہ 2.3 ڈگری سینٹی گریڈ ریکارڈ کیا گیا۔

لداخ کے لیہہ قصبے میں کم سے کم درجہ حرارت منفی 9.2 ، کرگل منفی 11.4 ، دراس منفی 19.9 ڈگری سینٹی گریڈ ریکارڈ کیا گیا۔

۔