اودھم پورمیں مفت طبی کیمپ

میڈیکل کیمپ میں متعدد امراض کے ماہر ڈاکٹروں نے حصہ لیا اور مریضوں کے مختلف قسم کے ٹیسٹ بھی بلا معاوضہ کیے گئے۔

ریاست جموں و کشمیر کے ضلع اودھم پور کے میونسپل کاؤنسل اور نارائن سپر اسپیشلیٹی اسپتال کے اشتراک سے میونسپل کاؤنسل کے ملازمین کے لیے مفت میڈیکل کیمپ کا انعقاد کیا گیا۔

کیمپ میں میونسپل کاؤنسل کے تقریباً تمام ملازمین نے اپنی طبی جانچ کرائی۔اودھم پور میونسپل کاؤنسل کے نائب میئر سردار سریندر سنگھ خالصہ نے ای ٹی وی بھارت کو بتایا کہ' کاؤنسل کے ملازمین کو کام کے دوران متعدد قسم کی مشکلات کا سامنا کرنا پڑتا ہے، اور کبھی بہت زیادہ گندگی کے علاقے میں کام کرنے کے سبب ان کی صحت پر منفی اثرات مرتب ہوتے ہیں۔

انھوں نے مزید کہا کہ' ان سب باتوں کے مد نظر میونسپل کاؤنسل اور نارائن سپر اسپیشلٹی اسپتال کے اشتراک سے اس میڈیکل کیمپ کا انعقاد کیا گیا۔

اس موقع پر ملازمین نے بھی کاؤنسل و ڈاکٹروں کا شکریہ ادا کرتے ہوئے کہا کہ' اس طرح کے کیمپ سے ان ملازمین کو کافی فائدہ ملے گا جو غریب ہونے کے سبب علاج کا خرچ برداشت نہیں کرپاتے ہیں۔

کیمپ میں آئے ڈاکٹروں کا کہنا ہے کہ' وہ اس طرح کے کیمپ لگاکر لوگوں کے درمیان آرہے ہیں علاوہ ازیں ان ملازمین کو صحیح وقت پر مناسب دوائی اور علاج مہیا کیا جارہا ہے۔