شمالی کشمیر کے سرحدوں پر شدید گولہ باری

گولہ باری کی وجہ سے عام زندگی مفلوج ہونے کے ساتھ ہی سرحدی آبادی میں ڈر و خوف کی لہر دوڑ گئی ہے۔

شمالی کشمیر کے تین اضلاع بارہمولہ، کپواڑہ اور بانڈی پورہ کے مختلف سیکٹرز میں بھارت اور پاکستان افواج کے درمیان لائن آف کنٹرول (ایل او سی) پر فائرنگ کا تبادلہ جاری ہے۔

اطلاعات کے مطابق آج کپواڑہ کے ٹنگڈار، بارہمولہ کے اوڑی اور بانڈی پورہ کے گریز سیکٹرز میں ایل او سی پر پاکستان کی جانب سے گولہ باری شروع کی گئی۔

بارہمولہ میں سرحد پار سے ہونے والی گولہ باری میں ایک گائے ہلاک ہوگئی تاہم اس دوران کسی بھی انسانی جان کے نقصان کی اطلاع نہیں ملی ہے۔

بانڈی پورہ کے مقامی لوگوں نے بتایا کہ دوپہر کے وقت بھارت اور پاکستان کے فوجیوں کے درمیان ایل او سی پر فائرنگ کا تبادلہ ہوا جس سے اضمرگ، باکتور کے علاقوں میں خوف و ہراس پھیل گیا جبکہ عام شہریوں کو محفوظ مقامات پر منتقل کردیا گیا۔

فوج کے ایک عہدیدار نے بھی سرحد پار سے ہونے والی اس گولہ باری کی تصدیق کی۔

انہوں نے کہا کہ پاکستان نے آج صبح مورٹار اور دیگر ہتھیاروں کا استعمال کر کے شمالی کشمیر میں مختلف مقامات پر بھارتی چوکیوں اور رہائشی علاقوں کو نشانا بنایا۔

انہوں نے کہا کہ بھارتی فوج بھی پاکستان کی جانب سے جنگ بندی کی خلاف ورزی کا مناسب جواب دے رہیں ہیں۔

ایک سینئر پولیس افسر نے بتایا کہ پاک فوج نے دوپہر کو ایل او سی کے ساتھ گریز کے باکتور سمیت متعدد مقامات پر موٹار اور دیگر ہتھیاروں سے فائرنگ کرکے بلا اشتعال فائر بندی کی خلاف ورزی کی۔