ہائر سکینڈری پلے گراؤنڈ میں ٹورنامنٹ کا افتتاح

محکمہ ڈسٹرکٹ یوتھ سروسز اینڈ سپورٹز اننت ناگ کی جانب سے صوبائی سطح پر انٹر ڈسٹرکٹ کرکٹ ٹورنامنٹ کا افتتاح کیا گیا ۔

ریاستی گورنر کے مشیر کے وجے کمار اور خورشید گنائی نے بجبہاڑہ ہائر سکینڈری پلے گراونڈ میں ٹورنامنٹ کا افتتاح کیا ۔

ان کے ہمراہ ضلع ترقیاتی کمشنر، اننت ناگ، خالد جہانگیر ، ڈائریکٹر ایجوکیشن، محمد یونس ملک ڈائریکٹر یوتھ سروسز سپورٹس ایس ایس پی اننت ناگ محمد الطاف خان معروف کرکٹر پرویز رسول کے علاوہ مختلف محکموں کے اعلی افسران موجود رہے۔

ٹورنامنٹ میں شرکت کرنے والی تمام ٹیموں نے کے وجے کمار، خورشید گنائی و دیگر اعلی عہدیداران کا والہانہ استقبال کیا۔ جس دوران مشیر نے تمام ٹیموں کے سربراہان سے ملاقات کی اور ان کی حوصلہ افزائی کی۔

دس جولائی سے اٹھارہ جولائی تک کھیلے جانے والے اس ٹورنامنٹ میں وادی کے تمام اضلاع سے دس ٹیمیں شرکت کر رہی ہیں ۔

اس موقع پر ایک افتتاحی تقریب کا بھی انعقاد کیا گیا ۔جس دوران گورنر کے مشیر خوشید احمد گنائی ڈی سی اننت ناگ و پرویز رسول کے علاوہ مقررین نے کھیل کود کی اہمیت و افادیت پر روشنی ڈالی ۔

افتتاحی میچ، اننت ناگ اور بانڈی پورہ کے درمیان کھیلا گیا ۔اننت ناگ ٹیم نے ٹاس جیت کر بلے بازی کی ۔

ٹرنامنٹ کی افتتاحی تقریب کے بعد رکن اسمبلی نے ہائر سکینڈری اسکول بجبہاڑہ میں تعمیر کیے گئے آڈیٹوریم کا افتتاح کیا گیا۔

اس دوران طلبہ نے کلچرل پروگرام پیش کرکے حاضرین کو محفوظ کیا۔

ای ٹی بھارت سے بات کرتے ہوئے گورنر کے مشیر خورشید احمد گنائی نے کہا کہ ٹورنامنٹ کا مقصد وادی کے باصلاحیت نوجوان کھلاڑیوں کو بہتر پلٹ فارم مہیا کرانا ہے تاکہ وہ ملکی و بین الاقوامی سطح پر اپنی صلاحیتوں کا بھرپور مظاہرہ کر سکیں۔

انہوں نے مزید کہا کہ نوجوانوں کو منشیات کی لت و دیگر برائیوں سے دور رکھنے کے لیے کھیل کود ایک بہترین ذریعہ ہے۔

گنائی نے کہا کہ حکومت کھیل کود کے بنیادی ڈھانچہ کو مزید مظبوط کرنے اور کھلاڑیوں کو تمام درکار سہولیات دستیاب کرانے کے لیے سنجیدگی سے کام کر رہی ہے۔