پانپور میں مکان گرنے سے ایک شخص زخمی

قصبہ پانپور کے کدلہ بل میں ایک غریب خاندان پر قیامت ٹوٹ پڑی جب شدید برفباری کی وجہ سے رہاٸشی مکان تباہ ہو گیا۔

قصبہ پانپور کے مین ٹاؤن کدلہ بل میں ایک غریب کنبے پر اُس وقت قیامت ٹوٹ پڑی جب آج صبح شدید برفباری کی وجہ سے ان کا رہائشی مکان تباہ ہو گیا ہے۔ اگرچہ گھر کے افراد خانہ کو مقامی لوگوں نے بروقت مکان سے صحیح سلامت باہر نکال لیا۔

تاہم گھر کا ایک فرد نثار احمد مکان کی دیواریں گرنے سے ملبے کے نیچے آگیا تھا جس کے بعد اسے زخمی حالت میں ملبے سے نکال لیا گیا۔

عین شاہدین کے مطابق آج صبح 4 بجے کے قریب اچانک ایک زور دار آواز سنائی دی جسے سن کر لوگ گھروں سے باہر آگئے اور انہوں نے دیکھا کہ ایک مکان برفباری کی وجہ سے حادثے کا شکار ہو گیا ہے۔

مقامی لوگوں نے تباہ شدہ مکان میں پھنسے ہوئے تمام افراد خانہ کو باہر نکال کر ایک بہت بڑا حادثہ ہونے سے ٹال دیا حالانکہ اس حادثے میں ایک شخص زخمی ہوا ہے۔

گھر کے افراد خانہ کا کہنا ہے کہ مکان گر جانے سے ان پر قیامت ٹوٹ پڑی ہے۔ ان کے پاس کچھ نہیں بچا ہے۔ انہوں نے کہا کہ سردی کے ان ایام میں اب ان کے پاس سر چھپانے کے لیے بھی کچھ نہیں بچا ہے۔