'زمینی قوانین میں تبدیلی کا حکم نامہ مسترد'

گپکار اعلامیہ کے لیے عوامی اتحاد ( پی اے جی ڈی) نے وزارت داخلہ کی جانب سے 26 اکتوبر کو جموں و کشمیر کے زمینی قوانین میں تبدیلی کے حکم نامہ پر انتظامیہ کے ترجمان کے بیان کو منگل کے روز مسترد کردیا۔

عوامی اتحاد برائے گپکار اعللامیہ نے مرکزی وزرات امور داخلہ کے 26 اکتوبر کے حکم نامے کو حقائق کو منسوخ کرنے اور لوگوں کو گمراہ کرنے سے عبارت کیا ہے۔

واضح رہے کہ مذکورہ حکم نامے کے مطابق مرکزی وزارت داخلہ نے جموں و کشمیر کے اراضی قوانین میں بڑے پیمانے پر ترمیم کر کے ملک کے کسی بھی شہری کو اس خطے میں غیر زرعی زمین خریدنے کا اختیار دیا ہے۔

عوامی اتحاد یا پیپلز الائنس کی طرف سے جاری ایک بیان میں کہا گیا کہ نئے اراضی قوانین کا بینادی محور جموں و کشمیر کی ڈیموگرافی کو تبدیل کرنا اور لوگوں کو بے اختیار بنانا ہے۔

بیان میں کہا گیا کہ جموں وکشمیر ملک کی پہلی ریاست تھی جس نے زرعی اصلاحات کے تصور کو عملی جامہ پہنایا۔

اس میں کہا گیا کہ جو بھی اس اقدام کو فرسودہ قرار دے گا وہ جموں و کشمیر کی تاریخ سے نابلد ہے۔

عوامی اتحاد نے بیان میں کہا ہے کہ زرعی اصلاحات کی بر وقت عمل آوری کا ہی نتیجہ ہے کہ جموں و کشمیر میں کوئی بھی فاقہ نہیں مرتا ہے نہ کوئی کسان خود کشی کرتا ہے۔

بیان میں کہا گیا ہے کہ نئے اراضی قوانین نہ صرف عوام کش ہیں بلکہ غیر جمہوری اور غیر آئینی بھی ہیں۔