شمالی کشمیر کے ضلع بارہمولہ کے سرحدی قصبہ اوڑی میں سبزیوں کی قیمت آسمان چھو رہی ہے جس سے عوام میں کافی اضطراب پایا جا رہا ہے۔
موسم سرما کے آتے ہی وادی میں برفباری کا سلسلہ شروع ہو جا تا ہے جس کے سبب وادی کا بیرونی علاقوں سے رابطہ ٹوٹ جاتا ہے اور وادی میں سبزیوں کی شدید قلت ہوجاتی ہے، وہیں سبزیوں میں کمی کی باعث ان کی قیمتیں آسمان چھونے لگتی ہیں۔
مہنگائی کے تعلق سے ایک مقامی شخص نے بتایا کہ موسم سرما کے پیش نظر جموں قومی شاہراہ بند ہوجانے سے اشیائے خورد و نوش میں یکایک کمی ہونے لگتی ہے۔ اور سبزیوں کی قیمیتوں میں خاص طور سے آئے دن اضافہ ہورہا ہے۔
سبزی فروش اویس احمد نے اس تعلق سے ای ٹی وی بھارت کو بتایا کہ جموں قومی شاہراہ بارش کی وجہ سے اکثرو بیشتر بند ہوجاتا ہے جس سے اوڑی میں سبزیاں کافی تاخیر سے پہنچتی ہیں اور سبزیوں کی قیمت میں مزید اضافہ ہو جاتا ہے۔
وہیں سبزی فروش اسرار احمد نے بتایا کہ دسمبر سے جنوری تک برفباری کے سبب اوڑی علاقے میں سبزیوں کو لانا کافی دشوار ہوجا تا ہے جس کے سبب یہاں کی کم قیمت والی اشیا بھی زیادہ قیمتوں پر فروخت کرنے لگتے ہیں، جس کے سبب یہاں کی غریب عوام کافی مشکلات کا سامنا کرتی ہے۔
