جموں و کشمیر میں دفعہ 370 کی منسوخی کے دو ماہ گزر چکے ہیں لیکن اب بھی وہاں کے حالات معمول پر نہیں لوٹے ہیں۔
اس سلسلے میں ای ٹی وی بھارت سے خصوصی بات چيت میں سابق وزیر بابو سنگھ نے کشمیر کو خصوصی حیثیت دینی والی دفعہ 370 کے ہٹائے جانے کو پوری طرح سے غلط قرار دیا۔
ان کا کہنا تھا: 'جموں وکشمیر میں آج جو کچھ بھی کیا جا رہا ہے وہ سب غیر قانونی ہے۔ حکومت نے دفعہ 370 ہٹا کر جموں و کشمیر کے عوام کے ساتھ ٹھیک نہیں کیا ہے۔'
ان کا کہنا تھا: 'یہ فیصلہ نہ صرف انسانیت کے خلاف بلکہ اس وعدے کے بھی منافی ہے جو سنہ 1948 میں جموں و کشمیر کے عوام سے کیا گیا تھا۔ دفعہ 370 کی منسوخی کا جموں و کشمیر کی ترقی کے سے کوئی تعلق نہیں ہے۔ وہاں پہلے سے ترقیاتی منصوبے موجود ہیں۔'
کشمیر مسئلے کے حل کے بارے میں بابو سنگھ نے کہا کہ 'یہ مسئلہ صرف سیاسی سطح پر بات کے ذریعے ہی حل ہوسکتا ہے۔ بھارت کو چاہیے کہ وہ پاکستان کے ساتھ اس تعلق سے بات کرے کیونکہ یہ دونوں ممالک کا آپسی معاملہ ہے۔'
انہوں نے کہا کہ 'اگر کشمیر میں حالات ایسے ہی رہے تو بھارت اور پاکستان کے درمیان ایٹمی جنگ کا خطرہ ہے، جس سے دونوں ممالک کو شدید نقصان اٹھانا پڑ سکتا ہے اور پورے بُرصغیر میں حالات بگڑ سکتے ہیں۔'
