کشمیری حجاج کرام کے پہلے قافلے کی آمد

کشمیر کے حجاج کرام کا فریضہ حج انجام دینے کے بعد واپس لوٹنے کا سلسلہ شروع ہوگیا ہے۔

آج پہلے قافلے میں 300 حجاج کرام دو پروازوں کے ذریعہ وادی واپس لوٹ آئے۔
سرینگر کے بین الاقوامی ہوائی اڈے کے باہر عزیز و اقارب کی بڑی تعداد نے حجاج کرام کا استقبال کیا۔
انتظامیہ کے مطابق حجاج کرام کے رشتہ داروں کو گھر سے ایئرپورٹ آنے اور جانے کے لیے پاسز جاری کئے گئے ہیں جبکہ حجاج کرام کے رشتہ داروں کا کہنا ہے کہ انہیں ایئرپورٹ تک جانے کے لیے کافی مشکلات پیش آئیں۔

وادی لوٹے حجاج کرام اپنے عزیزوں سے ملنے کے لیے بے چین نظر آئے کیونکہ تقریباً 13 دنوں سے ان کا رابطہ اپنے رشتہ داروں سے نہیں ہوپایا تھا۔واضح رہے کہ 5 اگست کو مرکزی حکومت کی جانب سے آرٹیکل 370 کی منسوخی کے بعد جموں و کشمیر میں سخت پابندیاں عائد کردی گئیں جس کی وجہ سے تمام مواصلاتی نظام کو بند کردیا گیا تھا۔