گزشتہ جمعرات کو سرینگر کے شہرت یافتہ جھیل ڈل کے قریب موجود نہرو پارک میں تباہ کن آگ میں 21 کنبوں کے رہائشی مکان خاکستر ہوگئے، تاہم ابھی تک متاثرین انتظامیہ سے امداد کے منتظر ہیں۔
متاثرین کے مطابق جمعرات کی رات دس بجے بجلی کرنٹ سے ایک رہائشی مکان میں آگ لگ گئی، جس میں تقریبا 21 مکان خاکستر ہوئے جن میں70 سے زائد افراد رہائش پزیر تھے۔
انکا کہنا ہے کہ موسم سرما میں ہولناک آگ کی وجہ سے وہ بے گھر ہوگئے ہیں اور تھر تھراتی سردیوں میں انکی زندگی اجیرن بن گئی ہیں۔آگ میں کروڑوں روپے مالیت کا نقصان ہوا ہے لیکن ابھی تک انتظامیہ پورے نقصان کا تخمینہ کرنے میں ناکام ثابت ہوئی ہیں۔
انہوں نے کہا کہ سرینگر ضلع انتظامیہ کے افسران نے جائے مقام پر آکر اعلان کیا تھا کہ متاثرہ کنبوں کو ایک لاکھ روپے کا معاوضہ دیا جائے گا۔ تاہم جب وہ متعلقہ افسران کے دفتر پہنچے تو وہاں ان کو بتایا گیا کہ ہر متاثرہ کنبے کو پانچ ہزار روپے معاوضہ دیا جائے گا۔
انہوں نے انتظامیہ سے گزارش کی کہ وہ معاوضے میں اضافہ کرکے فوری طور انکی مدد کریں تاکہ انہیں شدید سردی میں بہتر ٹھکانہ مل سکے۔
