ڈوڈہ: زلزلے کے جھٹکے، لوگوں میں خوف و ہراس

ضلع ڈوڈہ میں گزشتہ تین روز سے مسلسل زلزلے کے جھٹکے محسوس کئے گئے ہیں جس کی وجہ سے عوام میں کافی خوف و ہراس پایا جا رہا ہے۔

گزشتہ شب گیارہ بجے اور منگل کی صبح سات بجکر تین منٹ پر زلزلے کے جھٹکے محسوس کئے گئے اور یہ سلسلہ پورے دِن وقفہ وقفہ سے جاری رہا، جس کی وجہ سے لوگ گھروں سے باہر نکل آئے۔

واضح رہے کہ خطہ چناب ضلع ڈوڈہ سسمک زون پانچ میں آتا ہے اور بڑی شدت کا زلزلہ آنے کی صورت میں بڑے پیمانے پر تباہی کا اندیشہ ہے۔

ڈوڈہ کے شہری اشتیاق احمد دیو نے بتایا کہ چناب ویلی میں اس وقت لوگوں میں خوف پھیل گیا ہے کیونکہ یہاں مسلسل درمیانہ درجہ کے جھٹکے ہو رہے ہیں۔

اس سے قبل سال 2013 میں سینکڑوں بار ایک ہی ماہ کے اندر زلزلے کے جھٹکے محسوس کئے گئے تھے اور بڑے پیمانے پر عمارتوں ،سڑکوں کو نقصان پہنچا تھا۔

اُنہوں نے بتایا کہ یہ علاقہ زلزلے کے لئے حساس علاقہ مانا جاتا ہے لیکن سرکاری سطح پر چند روز کی مشق کے بعد کوئی اقدامات نہیں کئے گئے تھے۔

اس لئے انتظامیہ فوری طور یہاں آفت سماوی کے متعلق آلات کو نصب کریں تاکہ عوام بھی اس سے با خبر رہے۔

فیاض پامپوری نے بتایا کہ وہ صبح سے ہی یہاں کے لوگ کافی ڈرے ہوئے ہیں زلزلے نے ماضی میں بڑی تباہی مچائی ہے ۔