کشمیر: میڈیکل کالج کے لیے ایک بدنما داغ

مریضوں کو بہتر طبی سہولیات بہم پہنچانا جتنا ضروری ہے اتنا ہی ہسپتال کے ماحول کو صاف ستھرا رکھنا بھی ضروری ہے، تاہم آج کے جدید دور میں بھی اکثر و بیشتر سرکاری ہسپتالوں میں صاف و صفائی کا فقدان پایا جا رہا ہے جس کی واضح مثال ضلع پسپتال اننت ناگ ہے۔

ضلع ہسپتال اننت ناگ کو میڈیکل کالج کا درجہ بھی فراہم کیا گیا، تاہم ہسپتال کے احاطے کو کوڑے دان میں تبدیل کر دیا گیا ہے، اگرچہ میڈیکل کالج کا درجہ دینے کے بعد ہسپتال میں جدید سہولیات کی دستیابی کو یقینی بنایا گیا، تاہم ہسپتال کے احاطے میں برسوں سے موجود ڈمپنگ سائٹ کو ہٹانے پر کوئی دھیان نہیں دیا گیا۔

ہسپتال اور کینٹین سے نکلنے والا سارا کوڑا کرکٹ مذکورہ ڈمپنگ سائٹ میں جمع کیا جاتا ہے۔ ڈمپنگ سائٹ پر مویشیوں اور کتوں کی ہڑبونگ سے اسپتال آنے والے مریضوں اور تیماردار خوف محسوس کرتے ہیں۔

وہیں ڈمپنگ سائٹ سے پیدا شدہ بدبو کی وجہ سے اسپتال کے ماحول پر برے اثرات مرتب ہو رہے ہیں۔ جس سے نہ صرف بیماروں کو دقت ہو رہی ہے بلکہ تیمار داروں کے بھی بیمار ہونے کا خدشہ رہتا ہے۔

ادھر عام لوگ اسپتال کے احاطے میں موجود اس ڈمپنگ سائٹ پر افسوس کا اظہار کر رہے ہیں۔

ان کا کہنا ہے کہ ڈمپنگ سائٹ میڈیکل کالج کے لیے ایک بدنما داغ ہے۔ انہوں نے انتظامیہ سے ڈمپنگ سائٹ کو فوری طور ہٹانے کا مطالبہ کیا۔