ڈوڈہ کے جنگلات میں اس وقت سوکھی گھاس موجود ہے اور طویل عرصہ سے بارش نہ ہونے کی وجہ سے آگ کی واردتیں رونما ہو رہی ہیں۔
جمعرات کے روز شام کے وقت فارسٹ ڈویژن بھدرواہ کے کمپارٹنمنٹ نمبر اکسٹھ کیلاڑ میں آگ لگ گئی جس نے دیکھتے ہی دیکھتے پورے جنگل کو اپنی زد میں لے لیا۔
اگرچہ فارسٹ ڈویژن کے عملہ اور فارسٹ پروٹیکشن فورس کے رینج آفیسر کیلاڑ آفتاب احمد نے ڈی ایف او بھدرواہ کی ہدایت پر موقع پر پہنچ کر آگ پر قابو کرنے کی ہر ممکن کوشش کی تاہم تب تک آگ سے درجنوں کی تعداد میں سبز درخت جل کر تباہ ہو گئے تھے۔
فارسٹ آفیسر نے عوام سے اپیل کرتے ہوئے کہا کہ وہ جنگل میں گھاس کو آگ نہ لگائیں ایسے کرنے سے چھوٹے پودے تباہ ہو رہے ہیں اور مستقبل کے لئے انسانی جانوں کے لئے یہ قدم خطرناک ثابت ہو گا۔
