ڈوڈہ: ٹھاٹھری میں کرفیو جیسی پابندیاں عائد

ٹھاٹھری اسپتال میں محکمہ صحت کے دو ملازمین کا کورونا ٹیسٹ مثبت آنے کے بعد انتظامیہ نے ٹھاٹھری قصبہ میں کرفیو جیسی بندشیں عائد کی ہیں۔

جموں و کشمیر کے پہاڑی ضلع ڈوڈہ کے قصبہ ٹھاٹھری میں گزشتہ ایک ہفتے سے کورونا مثبت معاملات میں اضافے کے بعد انتظامیہ نے قصبے میں دوبارہ لاک ڈاؤن نافذ کیا ہے۔

اتوار کے روز ٹھاٹھری اسپتال میں محکمہ صحت کے دو ملازمین کا کورونا ٹیسٹ مثبت آنے کے بعد انتظامیہ نے ٹھاٹھری قصبہ میں کرفیو جیسی بندشیں عائد کی ہیں۔

ایس ڈی ایم ٹھاٹھری نے کہا کہ 'اگر کسی بھی فرد کو ٹھاٹھری قصبہ میں دکانوں کے قریب یا کہیں بھی بازار میں گھومتے ہوئے دیکھا گیا تو اُس کو چودہ دن کے لیے قرنطینہ میں رکھا جائے گا۔'

انہوں نے دیہات سے آنے والے تمام لوگوں سے درخواست کی ہے کہ وہ اپنے گھروں میں ہی رہیں اور اگلے احکامات تک ٹھاٹھری کا دورہ نہ کریں۔

ایس ڈی ایم ٹھاٹھری نے عوام سے اپیل کرتے ہوئے کہا کہ وہ اس مہلک وائرس سے خود بھی بچیں اور دوسروں کو تحفظ فراہم کرنے کے لئے انتظامیہ کو تعاون دیں۔ اس وقت قصبہ میں سخت بندشیں عائد کی گئی ہیں نیز کسی کو بھی اسپتال کے او پی ڈی میں جانے کی اجازت نہیں ہے جبکہ ہنگامی صورت حال میں مریض کو ڈوڈہ صدر اسپتال منتقل کیا جائے گا ۔'