گرمل کے کُل گاؤں کے اوپری حصّہ سے چٹانیں کھسکنے کے واقعہ کے بعد ضلع ترقیاتی کمشنر ڈوڈہ نے جائے موقع پر پہنچ کر حالات کا جائزہ لیا اور عوام سے اُس جگہ سے دور رہنے کی تلقین کی تھی۔
اس حوالے سے انتظامیہ کی ہدایت پر پیر کے روز محکمہ زیولوجی، تعمیرات عامہ و دیگر کہی محکموں نے تحصیلدار و بلاک ڈیویلپمنٹ کونسل کاستی گڑھ کے ہمراہ گُرمل کا دورہ کیا اور اُس جگہ کا معائنہ کیا جہاں سے پتھر گر کر رہائشی آبادی کے اوپر آ رہے ہیں۔
انتظامی آفسران و بی ڈی سی چئیرمین نے گُرمل کا دورہ کیا انتظامیہ کی جانب سے پہاڑی کے اُس حصّہ پر فوری اقدامات کا یقین دلایا گیا ہے تاکہ لوگوں کو کسی حد تک راحت مل سکے۔
بی ڈی سی چئیرمین نے گُرمل کے مقامی لوگوں کے ساتھ ملاقات کے بعد میڈیا کو بتایا کہ عوام خوف و ہراس میں مبتلا ہے اور وہ اپنے اہل و عیال کے تحفظ کے لیے فکر مند ہیں۔
انتظامیہ کی طرف سے پیش کردہ تجویز پر اپنے رد عمل کااظہار کرتے ہوئے بی ڈی سی چئیرمین عبدالغنی بٹ نے بتایا کہ پتھروں کو روک کر رکھنا مشکل کام ہے اور ایسا کرنا بے سود ثابت ہوگا۔چونکہ پہاڑی کا ایک بہت بڑا حصّہ کسی بھی وقت رہائشی آبادی کے اوپر ِگر سکتا ہے جو بڑا سانحہ کی وجہ بنے گا اور اب مذکورہ گاؤں میں رہائش کرنا خطرے سے خالی نہیں ہے۔
بٹ نے بتایا کہ متاثرہ کنبوں کو دوسرے محفوظ مقام پر اراضی فراہم کی جائے جہاں وہ اپنے لیے آشیانہ تعمیر کر سکیں ۔اس کے علاوہ اُن کے پاس کوئی چارہ نہیں ہے ۔گزشتہ روز قبل پہاڑی سے بھاری قامت والے پتھر رہائشی گھروں سے محض چند میٹر دوری پر اگر نہیں رُکتے تو کہی انسانی جانیں تلف ہو سکتی تھیں۔
اُنہوں نے انتظامیہ سے اپیل کرتے ہوئے کہا کہ کُل گاؤں کے متاثرہ کنبوں کو سرکاری اراضی پر رہائش کی اجازت دی جائے اور اس عمل میں انتظامیہ کی طرف سے دیری بڑے سانحہ کی وجہ بنے گی۔
