مقامی باشندہ محمد رفیع کا کہنا ہے کہ میدانہ تا ہاڑی بڈھالنک روڈ تھوڑی دور چلنے کے بعد ایسی بد حالی کا شکار ہے کہ گاڑیاں تو دور انسانوں کے پیدل چلنے کے قابل بھی نہیں ہے۔
جس کی وجہ سے ضلع پونچھ کی سب سے دوردراز ہاڑی بڈھا کی عوام مختلف قسم کی مشکلات سے دوچار ہے تاہم سب سے بڑی پریشانی سڑک کی خستہ حالی ہے۔
اس صورت حال میں گاڑیوں کا چلنا خطرے سے خالی نہیں ہے۔ تاہم قرب وجوار کے لوگوں کے لیے آمد و رفت انتہائی دشوار کن اور چیلینجز سے پُر ہے۔
صدام چودھری کے مطابق اس گاؤں سے کئی مریض ہسپتال تک پہنچتے پہنچتے دم توڑ دیتے ہیں بالخصوص خواتین کو بھی علاج کے لیے پونچھ یا سرنکوٹ ہسپتال جانے کی ضرورت ہوتی ہے تو سڑک کی بدحالی کے سبب ان کی بیماری میں مزید اضافے کا خدشہ لاحق ہو جاتا ہے۔
کئی بار تو سخت علالت کی وجہ سے ہسپتال جاتے جاتے بہت سے مریض دم توڑ دیتے ہیں
علاوہ ازیں سڑک کی انتہائی بد حالی اور خستہ حالی کے سبب ایمبولنس خدمات بھی فراہم نہیں ہوتی۔ مجبوراً بہت سے لوگ کاندھے پر مریض کو لے کر ہسپتال جاتے ہیں۔
علاقے کے لوگوں نے ضلع ترقیاتی کمشنر پونچھ سے علاقے کی طرف خصوصی توجہ اور سڑک تعمیر کروانے لیے ہدایات جاری کرنے کی اپیل کی ہے۔