پی اے جی ڈی امیدواروں کی فہرست آج جاری کر سکتا ہے

رواں مہینے کے آخر میں ہونے والے ضلع ترقیاتی انتخابات میں حصہ لینے کا اعلان کرنے کے چند روز بعد پیپلز الائنس فار گپکار ڈکلریشن جمعرات کو انتخابات کے پہلے مرحلے کے لیے امیدواروں کی فہرست جاری کر سکتا ہے۔

نیشنل کانفرنس کے جنرل سیکریٹری علی محمد ساگر نے ای ٹی وی بھارت کو بتایا کہ "پہلے مرحلے کے انتخابات کے لیے نامزدگی بھرنے کا آج آخری دن ہے۔ پی اے جی ڈی کے تحت آنے والی تمام سیاسی جماعتوں نے اپنے امیدواروں کے ناموں کی فہرست تیار کر لی ہے۔ الائنس کے سینئر لیڈرز کے مشورے کے بعد صدر فاروق عبداللہ امیدواروں کے ناموں کا اعلان کریں گے۔"

ان کا مزید کہنا تھا کہ " پہلے مرحلے کے انتخابات کے لیے امیدواروں کا اعلان آج فاروق صاحب کریں گے۔ ہم یہ انتخابات اقتدار کے لیے نہیں بلکہ عوام کی آواز بننے کے لیے لڑ رہے ہیں۔"

پی اے جی ڈی کا قیام دفعہ 370 اور 35 اے کی دوبارہ بحالی کے لیے کیا گیا ہے اور نیشنل کانفرنس، پیپلز کانفرنس، پیپلز ڈیموکریٹک پارٹی اور دیگر جماعتیں اس کا حصہ ہیں۔

قابل ذکر ہے کی فاروق عبداللہ نے پیر کے روز اعلان کیا تھا کہ پی اے جی ڈی کی تمام جماعتیں اپنے اپنے انتخابی نشان پر ہی انتخابات لڑیں گے تاہم ایک ساتھ لڑیں گی۔