ڈپٹی کمشنر کولگام اطہر عامر خان نے دور دراز ڈی کے مارگ علاقہ کا دورہ کیا

ڈپٹی کمشنر کولگام اطہر عامر خان نے آج ہفتہ کو دور دراز ڈی کے مارگ علاقہ کا دورہ کیا۔ انہوں نے مقامی باشندوں سے ملاقات کی اور ان کے مسائل جلد سے جلد حل کرنے کی یقین دہانی کرائی۔

کولگام :مرکز کے زیر انتظام یوٹی جموں و کشمیر کے ڈپٹی کمشنر کولگام اطہر عامر خان نے آج ہفتہ کو دور دراز ڈی کے مارگ علاقہ کا دورہ کیا۔ اس پروگرام میں زبردست عوامی ردعمل دیکھنے میں آیا اور ناگناد، چمر، ناگم، ڈی کے مرگ، کھل اور دیگر دیہات کے لوگوں نے کیمپ میں شرکت کی اور ڈی سی کو اپنے مسائل اور شکایات سے آگاہ کرنے کے علاوہ مختلف ترقیاتی اور فلاحی مطالبات بھی پیش کیے۔

کھل کے لوگوں نے علاقہ میں وائلڈ لائف کنٹرول روم کے قیام اور فلٹریشن پلانٹ کو فعال کرنے کا مطالبہ کیا۔ ان تمام علاقوں کے لوگوں نے متفقہ طور پر پی ایچ سی ڈی کے مارگ میں عملہ بڑھانے کا مطالبہ کیا۔ ناگناد کے لوگوں نے اہم عوامی مقامات پر اسٹریٹ لائٹس لگانے اور گجربستی,سربدری سڑک اور مختلف علاقوں میں تعمیراتی کاموں کا مطالبہ کیا۔اس دورے کا بنیادی مقصد پروجیکٹس کی موجودہ صورتحال کا جائزہ لینا تھا۔

اس بات کو یقینی بنانا کہ وہ بروقت تکمیل کے راستے پر ہیں۔ جائزہ کے دوران اطہر نے ہر پروجیکٹ سائٹ پر ہونے والی پیشرفت کا باریک بینی سے جائزہ لیا اور پیش رفت میں رکاوٹ بننے والے کسی بھی چیلنج سے نمٹنے کے لیے عہدیداروں کے ساتھ بات چیت کی۔