شادی سے قبل دلہن کا قتل، تمام ملزمین گرفتار

سرینگر کے سعدہ کدل علاقے میں شادی سے قبل دلہن کا مبینہ طور پر قتل کیا گیا تھا۔ تاہم اہل خانہ نے دعویٰ کیا تھا کہ دل کا دورہ پڑنے سے اس کی موت ہوگئی۔

جموں و کشمیر پولیس نے گزشتہ روز دعویٰ کیا کہ ہونے والی ایک دلہن کے قتل کا معاملہ حل کیا گیا ہے اور اس میں ملوث تمام ملزمین کو گرفتار کیا گیا ہے۔

دراصل 4 نومبر کو سرینگر سے تعلق رکھنے والی ایک لڑکی کی شادی ہونے والی تھی لیکن شادی سے قبل ہی ان کا قتل ہوگیا۔

خیال رہے کہ 4 نومبر کو سرینگر کے سعدہ کدل میں شادی سے قبل ہی ایک دلہن کی موت کی خبر جنگل کے آگ کی طرح پھیل گئی اور یہ بتایا گیا کہ دلہن کو شادی سے ایک روز قبل ہی دل کا دورہ پڑ گیا اور اس کی موت واقع ہوگئی۔

ادھر واقعے کے ایک ماہ 8 دن بعد جموں و کشمیر پولیس نے اس معاملے میں تحقیقات کر کے سنسی خیز انکشافات سامنے لائے۔ 30 سالہ شہزادہ جو سلطان محلہ سعدہ کدل کی رہنے والی تھی اور 5 نومبر 2020 کو جس کی شادی طے تھی کا قتل پولیس کے مطابق اس کے سوتیلے بھائی نے کیا ہے۔

پولیس بیان کے مطابق شہزادہ کا قتل شادی سے ایک روز قبل صبح سویرے نماز فجر کی حالت میں کیا گیا اور اس بے رحم اور دل دہلانے والے قتل میں ملوث سبھی ملزمان کو گرفتار کیا گیا ہے۔

متاثرہ کے منگیتر اور اس پورے معاملے کے شکایت کنندہ نے ای ٹی وی بھارت کے ساتھ بات کرتے ہوئے کہا کہ وہ کافی مطمئن ہیں اور پولیس کے بے حد شکر گزار ہیں کہ انہوں نے اس واقعے کی اصل حقیقت کو سامنے لایا۔

انہوں نے بتایا کہ پولیس نے بروقت کارروائی کرتے ہوئے صاف و شفاف طریقے سے تحقیقات کی۔

انہوں نے مطالبہ کیا ہے کہ اس قتل میں ملوث تمام ملزمین کو سخت سے سخت سزا ملنی چاہئے تاکہ دوبارہ اس طرح کی گھناؤنی حرکت کرنے کی کوئی جرات نہ کرسکیں۔