'اقتدار میں بیٹھے لوگوں کی تنقید کرنا ہر شہری کا حق'

عمر عبد اللہ کا یہ بیان ایک ایسے وقت آیا ہے جب لکشدیپ پولیس نے فلمساز عائشہ سلطانہ پر بی جے پی رہنما کی شکایت کے بعد ملک غداری کے الزامات کے تحت مقدمہ درج کیا ہے۔

نیشنل کانفرنس کے نائب صدر عمر عبداللہ نے جمعہ کے روز کہا کہ اقتدار میں بیٹھے لوگوں پر تنقید کرنا جمہوریت میں ہر شہری کا حق ہے اور 'حساس رہنماؤں' کو قدیم قوانین (ملک غداری قوانین) کے پیچھے چھپنا بند کرنا چاہیے۔

عبداللہ کا یہ بیان ایک ایسے وقت آیا ہے جب لکشدیپ پولیس نے فلمساز عائشہ سلطانہ پر بی جے پی رہنما کی شکایت کے بعد ملک غدازی کے الزامات کے تحت مقدمہ درج کیا ہے۔ انہوں نے ایک ٹی وی بحث کے دوران مرکز کے زیر انتظام علاقے میں کووڈ-19 کے حوالے سے بیان دیا تھا۔ جس کو بی جے پی نے غلط بیانی سے تعبیر کیا۔

عمر عبداللہ نے ٹویٹر پر لکھا 'پٹیل پر تنقید (لکشدیپ کے ایڈمنسٹریٹر پرفل پٹیل) ملک سے غدازی نہیں ہے۔ اگر ہم خود کو جمہوریت تصور کرتے ہیں تو، اقتدار میں موجود لوگوں پر تنقید کرنا ہر شہری کا حق ہے۔ ان 'حساس قائدین' کو قدیم قوانین کے پیچھے چھپنا بند کرنا چاہیے۔'

واضح رہے جب سے انتظامیہ نے لکشدیپ میں مبینہ اصلاحاتی اقدامات پر عمل درآمد شروع کیا ہے تب سے لکشدویپ میں مختلف سیاسی و سماجی جماعتوں نے احتجاج شروع کر دیا ہے۔