پلوامہ میں سخت لاک ڈاؤن جاری

جنوبی کشمیر کے ضلع پلوامہ کے سات گاؤں کو پہلے ہی ریڈ زون قرار دیا گیا اور اب ان علاقوں میں بندشوں میں مزید سختی برتی جارہی ہے۔

وادی کشمیر میں گزشتہ 25 روز سے لاک ڈاؤن جاری ہے جس کی وجہ سے معمولات زندگی متاثر ہوکر رہ گئی ہے۔

کورونا وائرس کو مزید پھیلنے سے روکنے کے لیے جہاں ملک میں نافذ لاک ڈاؤن پر سختی سے عمل آوری کی جارہی رہی ہے وہیں وادی کشمیر میں بھی مسلسل لاک ڈاؤن کے پیش نظر لوگ گھروں میں محدود ہو کر رہ گئے ہیں۔ لاک ڈاون کے سبب سڑکوں پر سناٹا چھایا ہوا ہے اور دکانیں بھی مکمل طور بند پڑی ہوئی ہیں۔وہیں کورونا وائرس کے کیسز میں مسلسل اضافہ ہونے کے سبب اہلیان وادی میں سخت تشویش پیدا ہوگئی ہے اور لوگوں میں سخت خوف و ہراس پھیل گیا ہے ۔ اس دوران انتظامیہ کی جانب سے بندشوں میں مزید سختی برتی جارہی ہے۔ جموں و کشمیر میں کورونا وائرس کے معاملات میں اضافہ ہورہا ہے اور محکمہ صحت نے اس مہلک بیماری سے نمٹنے کے لیے ریڈ اور بفر زون بنا کر کلسٹرز پر قابو پانے کی حکمت عملی نافذ کردی ہے۔

اس دوران لوگوں کی نقل وحمل پر مکمل پابندیاں عائد رہیں اور سیکورٹی فورسز نے بیشتر سڑکوں اور گلی کوچوں کو سیل کرکے لوگوں کی غیر ضروری نقل و حرکت کو محدود کر دیا۔ صرف ان لوگوں کو ہی چلنے پھرنے کی اجازت ہے جن کے پاس معتبر اجازت نامے ہیں۔

ادھر وادی میں ریڈ زون قرار دیے گئے علاقوں میں پابندیوں کو مزید سخت کیا جارہا ہے اور ان علاقوں کو اسٹینڈرڈ آپریٹنگ پروسیجر کے تحت سیل کیا جارہا ہے۔ ریڈ زون علاقوں میں داخل ہونے والے راستوں کو بند کیا گیا ہے اور ضوابط کے مطابق ان پر 'ریڈ زون' کے بینر چسپاں کئے گئے ہیں۔