کورونا وائرس: گلمرگ کے ہوٹلز کے لیے ایڈوائزری جاری

جموں و کشمیر انتظامیہ نے شمالی کشمیر کے معروف سیاحتی مقام گلمرگ میں واقع تمام ہوٹلز کو کورونا وائرس کے پیش نظر جاری کردہ ایڈوائزری پر عمل کرنے کو کہا ہے۔

کورونا وائرس کے تناظر میں حکام نے جمعہ کے روز سب ڈویژن گلمرگ کے تمام ہوٹلز کو ایڈوائزری جاری کی ہے اور انہیں ہدایت دی گئی ہے کہ اس وبا پر قابو پانے کے لیے نیشنل سینٹر فار ڈیزیز کنٹرول (آئی ڈی ایس ٹی) کے تحت جاری کردہ ایڈوائزری / ہدایت پر عمل درآمد کو یقینی بنائیں۔

حکام کی جانب سے جاری کردہ ایڈوائزری کے مطابق ہوٹلز کو مہمانوں کی تفصیلات روزانہ کی بنیاد پر گلمرگ میں اسسٹنٹ ڈائریکٹر ٹورزم کے دفتر میں جمع کروانے کے لیے کہا گیا ہے۔ یہ حکمنامہ ایس ڈی ایم گلمرگ شبیر الحسن (کے اے ایس) نے جاری کیا۔

اطلاعات کے مطابق اسسٹنٹ ڈائریکٹر ٹورزم ہوٹل مالکان سے روزانہ کی بنیاد پر فارم کی معلومات اکٹھا کریں گے اور وہاٹس ایپ فون کے ذریعے شام 7 بجے تک اس دفتر کو معلومات پیش کریں گے۔