کولگام کے مین ٹاؤن میں سرچ آپریشن ختم

گزشتہ روز اننت ناگ میں ایک سیاسی رہنما پر مشتبہ عسکریت پسندوں کی جانب سے حملہ کرنے کے بعد جنوبی کشمیر میں سکیورٹی فورسز کی جانب سے مزید تلاشی کارروائیاں انجام دی جارہی ہیں۔

جنوبی کشمیر کے کولگام میں آج علی الصبح سکیورٹی فورسز کی جانب سے شروع ہونے والی تلاشی مہم اب پرامن طریقے سے اختتام پذیر ہوگئی ہے۔

اطلاعات کے مطابق سکیورٹی فورسز نے علی الصبح قصبے کے مین ٹاؤن ریشی پورہ، نائک پورہ، ملپورہ،غوثیہ کالونی، اسپتال روڈ، زیارت گلی، لبڑی پورہ، لارکی پورہ و دیگر کئی وارڈوں میں تلاشی کارروائی شروع کی تھی۔

سرکاری ذرائع کے مطابق سکیورٹی فورسز کو خدشہ تھا کہ عسکریت پسندوں کا گروپ قصبے کے مین ٹاؤن میں موجود ہیں جس کی وجہ سے تمام وارڈوں میں تلاشی کارروائی شروع کی گئی تھی۔

واضح رہے کہ گزشتہ روز اننت ناگ میں ایک سیاسی رہنما پر حملہ ہونے کے بعد جنوبی کشمیر میں سکیورٹی فورسز کی جانب سے مزید تلاشی کارروائیاں انجام دی جارہی ہیں۔

ایسے میں اننت ناگ کے ساتھ ساتھ جنوبی کشمیر کے دیگر اضلاع کولگام، پلوامہ، شوپیان میں سکیورٹی فورسز کو مزید مستعد کر دیا گیا ہے۔

قابل ذکر ہے کہ جموں و کشمیر میں پہلی بار منعقد کیے جانے والے ڈی ڈی سی کے انتخابات کو لے کر ضلع کولگام کے مین ٹاؤن میں سات تاریخ کو ووٹ ڈالے جائیں گے۔