محکمہ دیہی ترقی کے عارضی ملازمین کا خاموش احتجاج

جموں و کشمیر کے ضلع پلوامہ کے ترال میں اپنے مطلبات کو لیکر محکمہ دیہی ترقی میں کام کر رہے منریگا ملازمین نے مقامی دفتر کے احاطے میں ایک خاموش احتجاج کر کے اپنی بات حکام تک پہنچانے کی کوشش کی۔

تفصیلات کے مطابق گزشتہ کئی برسوں کے دوران محکمہ دیہی ترقی میں کام کر رہے ان عارضی ملازمین نے بلاک آفس ترال میں جمع ہو کر ایک احتجاج کیا اور اس بات پر زور دیا کہ اگر ان کے مطالبات پورے نہیں کیے گئے تو وہ احتجاج میں شدت لائیں گے۔

ایک احتجاجی ملازم معراج الدین نے ای ٹی وی بھارت کے ساتھ بات کرتے ہوئے بتایا کہ محکمہ دیہی ترقی میں وہ دیگر ملازمین کے ساتھ گزشتہ دس برسوں سے کام کر رہے ہیں اور پڑھے لکھے ہونے کے ساتھ ساتھ محکمے کو انھوں نے خون سے سینچا ہے لیکن اب محکمہ انکو مستقل کرنے میں لیت ولعل کا مظاہرہ کر رہا ہے۔

ایک اور ملازم نے بتایا کہ ہماری یونین نے تین روزہ کام چھوڑو ہڑتال کی کال دی ہے اور ہم بحیثیت کارکن اس تحریک میں برابر شریک ہیں۔

احتجاجی ملازمین نے مطالبہ کیا انھیں دیہی ترقی محکمے میں مستقل کیا جائے اور ان کے ساتھ انصاف کا معاملہ کیا جائے۔