'تین مئی تک لاک ڈاؤن پر سختی سے عمل درآمد جاری رکھیں'

مرکزی حکومت نے تمام ریاستوں اور مرکزی علاقوں کی انتظامیہ سے کہا کہ 3 مئی 2020ء تک لاک ڈاؤن کی مکمل عمل آوری کو یقینی بنائیں تاکہ ملک میں کووِڈ ۔19 کے پھیلاﺅ پر قابو پایا جاسکے۔

حکومت نے صورتحال کا جائزہ لینے کے بعد 20 اپریل کے بعد جُزوی راحت دینے کا فیصلہ لیا ہے۔ اِس بات کا اِظہار کابینہ سکریٹری راجیو گابا نے آج تمام ریاستوں اور یوٹیز کے چیف سیکریٹریز اور پولیس سربراہوں کے ساتھ ایک ویڈیو کانفرنسنگ کے دوران کیا۔

میٹنگ میں وزیر اعظم کے پرنسپل سیکرٹری ڈاکٹر پی کے مشرا، سکریٹری صحت پریتی سودن ، سکریٹری داخلہ اجے کمار بھلہ اور متعلقہ وزارتوں کے سیکریٹریز نے شرکت کی۔

جموں وکشمیر کے چیف سکریٹری بی وی آر سبھرامنیم، پولیس سربراہ دِلباغ سنگھ، فائنانشل کمشنر صحت اَتل ڈولو ، پرنسپل سیکرٹری داخلہ شالین کابرا، پرنسپل سکریٹری مکانات و شہری ترقی دھیرج گپتا، پرنسپل سیکریٹری منصوبہ بندی روہت کنسل، کمشنر سیکرٹری صنعت و حرفت منوج دِویدی اور سکریٹری خوراک و امور صارفین نے ویڈیو کانفرنسنگ کے ذریعے میٹنگ میں شرکت کی۔

اَفسران کے ساتھ تبادلہ خیال کرتے ہوئے کابینہ سکریٹری نے کہا کہ' ملک گیر لاک ڈاون کی موثر عمل آوری میں ہم سب کو اپنا رول ادا کرنا ہوگا۔'

اُنہوں نے چیف سکریٹریز کو ہدایت دی کہ وہ صورتحال پر کڑی نگاہ رکھیں۔ کابینہ سیکرٹری نے ریاستوں اور یوٹیز کو ہدایت دی کہ وہ ریڈ زُونز میں وائرس کے پھیلاﺅ کو روکنے کے لئے مناسب لائحہ عمل اپنائیں۔

اُنہوں نے اِس سلسلے میں ڈپٹی کمشنروں اور فیلڈ اَفسروں کو ضروری ہدایات دینے کے لئے کہا تاکہ لاک ڈاون سے مطلوبہ نتائج حاصل کئے جاسکیں۔

کابینہ سیکرٹری نے کہا کہ لوگوں کی مشکلات دُور کرنے کے لئے مرکزی حکومت نے اِضافی اقدامات اُٹھانے کا فیصلہ کیا ہے۔اُنہوںنے کہا کہ جامع رہنما خطوط جاری کئے گئے ہیں اور لاک ڈاون کی مو ¿ثر عمل آوری کو یقینی بنایا جائے گا۔

دیہی اِقتصادیات کے بارے میں کابینہ سیکرٹری نے کہا کہ ریاستوں اور یوٹیز کی حکومتوں کو یہ بات یقینی بنانی ہوگی کہ دیہات میں محدود طریقے پر زرعی اور باغبانی سرگرمیاں جاری رہیں۔وزارتِ صحت نے بھی وائرس کے روک تھام کے لئے بامعنی اِقدامات کئے ہیں۔

جموں وکشمیرکی صورتحال کے بارے میں کابینہ سیکرٹری کو جانکاری دیتے ہوئے چیف سیکرٹری بی وی آر سبھرامنیم نے کہا کہ جموںوکشمیر میں مرکزی حکومت کی ہدایات پر من و عن عمل جاری ہے ۔اُنہوں نے کہا کہ جموں وکشمیر کے مختلف اَضلاع میں تمام ریڈ زُونز نامزد کر کے اُن پر کڑی نگا ہ رکھی جارہی ہے۔

اُنہوں نے کہا کہ جموں وکشمیر میں کورونا وائرس کے پھیلاﺅ کو روکنے کے لئے ہر طرح کے ضروری اِقدامات کئے جارہے ہیں۔