مرہامہ سڑک کی خستہ حالی

وادی کشمیر میں جاری نامساعد حالات کے دوران جہاں عام زندگی مفلوج ہو کر رہ گئی ہے وہیں ترقیاتی پروجیکٹوں پر تعمیراتی سرگرمیاں بند ہونے سے عام لوگوں کو مشکلات کا سامنا ہے۔

ضلع اننت ناگ کے مرہامہ علاقے میں سڑک کا تعمیری کام رک جانے سے رابطہ سڑک کافی خستہ ہو چکی ہے۔ اگرچہ آر اینڈ بی محکمے کی جانب سے سنگم کے مقام پر قومی شاہراہ سے سریگفوارہ علاقے تک ایک پروجیکٹ کے تحت سڑک کو کشادہ کرنے اور میگڈامائز کرنے کا کام عمل میں لایا گیا۔ جس کے چلتے گزشتہ دو برسوں سے مذکورہ سڑک پر تعمیری کام جاری تھا۔

تاہم وادی میں پانچ اگست سے جاری نامساعد حالات کے چلتے اس پروجیکٹ کا کام بند ہو گیا۔ تعمیراتی کام بند ہونے کے سبب سڑک میں گہرے گڑھے بن گئے ہیں۔

خشک موسم کے دوران گرد و غبار اور بارش کے دوران سڑک تالاب کی شکل اختیار کر لیتی ہے جن کے سبب علاقے کے لوگوں کو عبور و مرور میں کافی دقتوں کا سامنا کرنا پڑتا ہے۔

سڑکوں کی حالت اتنی خستہ ہو چکی ہے کہ گاڑیوں کا چلنا بھی دشوار بن جاتا ہے۔

اس سلسلے میں مقامی لوگوں نے مذکورہ پروجیکٹ پر جلد سے جلد کام شروع کرنے اور عوام کو فوری طور راحت پہنچانے کی گورنر انتظامیہ سے اپیل کی ہے۔