بتادیں کہ وادی میں 20 روزہ چلہ خورد جمعہ سے مسند اقتدار پر جلوہ افروز ہوا۔ چلہ خورد کا دور اقتدار جہاں چلہ کلان سے کم ہے وہیں اس کے دور حکومت میں سردیوں کا زور بھی قدرے کم ہی ہوتا ہے۔
ادھر محکمہ موسمیات نے وادی میں ماہ رواں کی 6 تاریخ تک موسم مجموعی طور پر خشک رہنے کی پیش گوئی کی ہے۔
وادی کا بیرون دنیا کے ساتھ زمینی و فضائی رابطہ برابر برقرار و بحال ہے۔ ہائی وے ذرائع کے مطابق وادی کو ملک کے دوسرے حصوں کے ساتھ جوڑنے والی سری نگر – جموں قومی شاہراہ پر ہفتہ کے روز بھی یک طرفہ ٹریفک کی نقل وحمل جاری رہی اور گاڑیوں کو جموں سے سری نگر جانے کی اجازت دی گئی۔
وادی میں چلہ خورد کے دوسرے دن ہفتہ کے روز بھی موسم خشک رہا اور دن میں ہلکی دھوپ بھی کھلی رہی اور لوگوں کو دوران دن پارکوں، دکان کے تھڑوں اور سڑک کے کناروں پر ہلکی دھوپ سے لطف اندوز ہوتے ہوئے دیکھا گیا۔
لوگوں کا کہنا ہے کہ چلہ خورد اگرچہ اپنے تیکھے تیور کبھی بھی دکھا سکتا ہے لیکن سردی کی شدت میں ہر گزرتے دن کے ساتھ اب کمی ہی واقع ہوگی۔
محکمہ موسمیات کے ایک ترجمان کے مطابق سری نگر میں کم سے کم درجہ حرارت منفی 2.5 ڈگری سینٹی گریڈ ریکارڈ کیا گیا جو گزشتہ شب کے منفی درجہ حرارت سے قدرے بہتر ہے۔
انہوں نے بتایا کہ وادی کے مشہور آفاق سیاحتی مقامات پہلگام اور گلمرگ میں کم سے کم درجہ حرارت بالترتیب منفی 8.9 ڈگری سینٹی گریڈ اور منفی 12.2 ڈگری سینٹی گریڈ ریکارڈ ہوا ہے۔
وادی کے سرحدی ضلع کپواڑہ میں کم سے کم درجہ حرارت منفی 5.3 ڈگری سینٹی گریڈ جبکہ قاضی گنڈ اور کوکرناگ میں کم سے کم درجہ حرارت بالترتیب منفی 1.4 ڈگری سینٹی گریڈ ور منفی 3.4 ڈگری سینٹی گریڈ ریکارڈ کیا گیا۔
لداخ یونین ٹریٹری کے ضلع لیہہ میں کم سے کم درجہ حرارت منفی 15.3 ڈگری سینٹی گریڈ ریکارڈ کیا گیا۔
