بڈگام: کورونا کے سبب اسکول بند

ایک استاذ کے کورونا مثبت پائے جانے کے سبب اسکول انتظامیہ کی جانب سے اسکول کو پانچ روز کے لیے بند کر دیا گیا۔

وسطی کشمیر کے ضلع بڈگام میں واقع اسکول کے ایک استاذ میں آج کورونا کا انفکشن پائے جانے کے سبب اسکول انتظامیہ نے اسکول کو پانچ روز کے لیے مکمل طور پر بند کر دیا ہے۔
اس تعلق سے ایجوکیشن محکمہ کے افسر نے بتایا کہ 'ریپڈ ٹیسٹ ڈرائیو کے دوران گورنمنٹ گرلز ہائر سیکنڈری اسکول بڈگام میں کنٹریکٹ ٹیچر کا کووڈ-19 ٹیسٹ مثبت آیا ہے،' اس کے فوراً بعد اسکول کو اگلے پانچ روز کے لیے مکمل بند رکھنے کے ہدایات دی گئی ہیں۔
انہوں نے مزید بتایا کہ 'اسکول کی طالبات کے علاوہ ٹیچنگ اور نان ٹیچنگ اسٹاف میں اس وائرس کو پھیلنے سے روکنے کے لیے یہ اقدامات کیے گئے ہیں۔' اس کے علاوہ جو بھی متاثرہ استاذ کے رابطے میں آئے ہیں، انہیں آئیسولیٹ کیا گیا ہے۔